ពេលនេះនរណាៗក៏ល្បីពីកំពូលខ្សែប្រយុទ្ធទាំងបីរបស់ PSG គឺ Edinson Cavani, Neyma Jr., , និង Kylian Mbappe ដែលត្រូវបានគេចាត់ទុកជាទូទៅថា ជាខ្សែប្រយុទ្ធដៃគូមានឥទ្ធិពលបំផុតក្នុងពិភពបាល់ទាត់អឺរ៉ុប ប៉ុន្តែការពិត មិនដូចការគិតឡើយ។
កាសែត Marca របស់អេស្ប៉ាញបានរាយការណ៍ថា ខ្សែប្រយុទ្ធទាំងបីរបស់របស់ Lyon គឺ Nabil Fekir, Mariano Diaz និងMemphis Depay បានកាន់កំណត់ត្រាខ្សែប្រយុទ្ធដៃគូបីនាក់មានឥទ្ធិពលបំផុតក្នុងរដូវកាលនេះ ដោយរកគ្រាប់បាល់បានច្រើនជាងខ្សែប្រយុទ្ធទាំងបីនាក់របស់ PSG ក្នុងក្របខណ្ឌ Ligue 1។
កីឡាករទាំងបីរបស់ Lyon រកបានគ្រាប់បាល់២៦គ្រាប់ក្នុងរដូវកាលថ្មីនេះក្នុង Ligue 1 គឺមានស្ថិតិគ្រាប់បាល់ច្រើនជាងខ្សែប្រយុទ្ធ Cavani, Mbappe, Neymar របស់ PSGទៅទៀតដែលទើបរកបាន២៤គ្រាប់។ ចំណែកខ្សែប្រយុទ្ធទាំងបីរបស់ Man City គឺ Aquero, Gabriel Jesus, និង Raheem Steling ឈរលេខ៣មាន២២គ្រាប់ ហើយ Dybala, Higuain និង Juan Cuadrado របស់ Juventus រកបាន២១គ្រាប់។
ខណៈពេលដែលខ្សែប្រយុទ្ធទាំងបីរបស់ Lyon នេះកំពុងឡើងជើងខ្លាំង Fekir រកបានគ្រាប់បាល់ច្រើនជាងគេគឺ១១គ្រាប់ក្នុង១១ប្រកួតនៃក្របខណ្ឌ Ligue 1។ ចំណែក Mariano កំពុងតែឡើងថ្វីជើងរកគ្រាប់បាល់ ក្រោយមានឱកាសលេងពេញលេញ បន្ទាប់ពី Real Madrid អនុញ្ញាតិឲ្យចាកចេញកាលពីដើមរដូវកាល ដោយរកបាន៩គ្រាប់ក្នុងចំណោម១២ប្រកួតក្នុងលីក។
ចំណែកអតីតខ្សែប្រយុទ្ធស្លាប Manchester United កីឡាករ Memphis Depay ក៏រកឃើញភាពខ្លាំងរបស់ខ្លួនឡើងវិញដោយរកបាន៦គ្រាប់ក្នុងចំណោម១១ប្រកួត។ បើនិយាយពីសរុបគ្រាប់បាល់ទាំងអស់ដែលក្រុមកីឡាករ Lyon រកបានគឺ៣២គ្រាប់ក្នុង Ligue 1 ឆ្នាំនេះ ខណៈអត្រា៨១.២៥%រកបានដោយខ្សែប្រយុទ្ធទាំងបីខាងលើ៕
