ការប្រកួតពានរង្វាន់លីកកំពូលកម្ពុជា Metfone Cambodian League នឹងត្រូវឈប់សម្រាកក្រោយចប់សប្ដាហ៍ទី៣ នេះដើម្បីរៀបចំឲ្យក្រុមជម្រើសជាតិត្រូវប្រកួតមិត្តភាពជាមួយជម្រើសជាតិឡាវ និងការប្រកួតវគ្គជម្រុះពាន AFC Asian Cup ជាមួយអាហ្វហ្គានីស្ថាន។
ដោយស្របទៅតាមកាលវិភាគ FIFA DAY ឬ International Breakបានមកដល់ ហើយក្រុមជម្រើសជាតិនានាក្នុងពិភពលោកដែលមានភារកិច្ចត្រូវប្រកួតមិត្តភាព និងពានរង្វាន់ផ្សេងៗ គណៈកម្មការរៀបចំការប្រកួតបាល់ជាតិបានសម្រេចឲ្យមានការឈប់សម្រាកចាប់ពីថ្ងៃទី១៩មីនា ដល់ថ្ងៃទី០៦ មេសា ឆ្នាំ២០១៨ ដើម្បីទុកពេលឲ្យក្រុមជម្រើសជាតិ ធ្វើដំណើរនិងហ្វឹកហាត់ត្រៀមខ្លួនប្រកួតក្នុងលក្ខណៈអន្តរជាតិ។
កម្ពុជាត្រូវប្រកួតមិត្តភាពជាមួយជម្រើសជាតិឡាវ នៅថ្ងៃ ទី ២១ ខែ មីនាឆ្នាំ២០១៨ នៅទីក្រុងវៀងចន្ទន៍ ខណៈការប្រកួតពានរង្វាន់ AFC Asian Cup UAE Qualifiers Final Round ជាមួយជម្រើសជាតិអាហ្វហ្គានីស្ថាននៅថ្ងៃទី ២៧ មីនា ឆ្នាំ២០១៨ ក្នុងទឹកដីកណ្ដាលប្រទេសតាហ្ស៊ីគីស្ថាន៕
