កីឡការិនី អេ យ៉ានុត នឹងឡើងលើសង្វៀនក្បាច់គុនចម្រុះ (MMA) ជាមួយកីឡការិនិចិន Xu Chun Yan ក្នុងព្រឹត្តិការណ៍ One Championship នៅទីក្រុងសៀងហៃ ប្រទេសចិន ដែលនឹងចាប់ផ្តើមនៅថ្ងៃទី០២ ខែកញ្ញា ខាងមុខនេះ ខណៈកូនស្រីអ្នកប្រដាល់ជើងចាស់ អេ ភូថង សង្ឃឹមខ្ពស់ថា នឹងអាចដណ្តើមជ័យជម្នះមកជួនប្រទេសកម្ពុជា។

កីឡាការិនីជើងខ្លាំងប្រដាល់គុនខ្មែររូបនេះ បានឲ្យដឹងថា សម្រាប់ប្រកួតក្បាច់គុនចម្រុះនេះ ជាលើកទី២ហើយ ក្នុងការចូលរួមប្រកួត ដោយរំពឹងថា នឹងអាចយកឈ្នះកីឡាការិនីម្ចាស់ផ្ទះចិន លើសង្វៀន (MMA)  លើកនេះ។ យ៉ានុត បញ្ជាក់ថា “នៅពេលនេះខ្ញុំនៅមានក្តីបារម្ភណ៍ខ្លះៗ ដែរ ព្រោះខ្លាចចាញ់កម្លាំងគេ ប៉ុន្តែនៅពេលនេះ ខ្ញុំកំពុងបង្កើនការហ្វឹកហាត់ខ្លាំងលើផ្នែកកម្លាំង ដើម្បីពេញនូវកី្តបារម្ភណ៍របស់ខ្ញុំផងដែរ”។

កីឡាការិនីអ្នកប្រដាល់គុនខ្មែរ ប្រដាល់សកល និង ក្បាច់ចម្រុះរូបនេះ បន្ថែមទៀតថា កីឡាការិនី Xu Chun Yan គឺជាអ្នកប្រដាល់សកលជើងខ្លាំងម្មាក់ នៅប្រទេសចិន និងមានអាយុច្រើនជាងខ្លួន ជាពិសេសមានបទពិសោធន័ច្រើនទៀតផង ប៉ុន្តែបើទោះជាងយ៉ាងនេះក្តី យ៉ានុត នៅតែមិនខ្លាចដែរ ហើយបានតាំងចិត្តថា និងខិតខំប្រកួតឲ្យអស់ពីសមត្ថភាព ដើម្បីយកឈ្នះលើកីឡការិនចិននេះឲ្យបាន៕