ការបន្ថែមកីឡាករកូតាអាស៊ាន ក្នុងលីកកំពូលម៉ាឡេស៊ី បានធ្វើឲ្យមានការចាប់អារម្មណ៍ពីអ្នកគាំទ្របាល់ទាត់ក្នុងតំបន់។ពេលនេះគេហទំព័រមួយបានបង្ហាញកីឡាករអាស៊ាន៥នាក់អាចជោគជ័យនៅ Malaysia Super League។
CHAN VATHANAKA
កីឡាករល្អបំផុតរបស់ជម្រើសជាតិកម្ពុជារូបនេះ ហាក់មិនទាន់បង្ហាញទម្រង់លេងល្អណាស់ណានោះទេ ស្របពេលគ្រូបង្វឹកដាក់ឲ្យលេងខុសពីជំនាញពីកំណើតរបស់ខ្លួនស្របពេលក្លឹប Pahang FA ក៏ចាប់ផ្ដើមមិនសូវល្អដែរនោះ។
វឌ្ឍនាកាគឺជាកីឡាកររកបានគ្រាប់បាល់ច្រើនបំផុត២រដូវកាលជាប់គ្នាពេលលេងនៅ Cambodian League ២ឆ្នាំចុងក្រោយមុនពេលទៅអង្គុយខកចិត្តនៅក្លឹបលីកទីបីជប៉ុន Fujieda MYFC។ កីឡាករវ័យ២៤ឆ្នាំពាក់លេស១១នៅឲ្យដំរីព្រៃ Pahang ហើយត្រូវបានដាក់ឲ្យលេងក្នុងដំណែងបម្រើប្រយុទ្ធស្លាបឆ្វេង ដោយទុកជំនាញខ្សែប្រយុទ្ធមុខទីចោលមួយឡែកសិន។
លោក Dollah Saleh ចូលចិត្តទម្រង់៤-២-៣-១ ហើយវឌ្ឍនាកាស្ថិតក្នុងតំបន់បម្រើប្រយុទ្ធទាំងបីជាមួយ Norshahrul Idlan Talanha និង Mohamadou Sumareh ដែលអ្នកទាំងពីរត្រូវលេងពីក្រោយខ្សែប្រយុទ្ធមុខទី Francia Forkey Doe។ ទម្រង់លេងបែបនេះ រូបគេមិនអាចរកគ្រាប់បាល់បានច្រើននោះទេ ប៉ុន្តែការរំពឹងទុករបស់គ្រូបង្វឹកគឺអាចបញ្ជូនបាល់ឲ្យមិត្តរួមក្រុមសុទ្ធបញ្ចូលទី និងបង្កើតឱកាសរកគ្រាប់បាល់ដោយបាល់ Set-Pieces ។
ជារី ចន្ថាប៊ីន
ការទៅលេងនៅលីកកំពូលម៉ាឡេស៊ី របស់ចន្ថាប៊ីន ហាក់មិនសូវលេចឡើងក្នុងទំព័រមុខរបស់បណ្ដាញសារព័ត៌មាន នៅអាស៊ាន ដូចវឌ្ឍនាកា និងកីឡាករមួយចំនួនទៀតនោះទេ តែកុំភ្លេចថាជាកីឡាករសំខាន់របស់គ្រូបង្វឹកលោក Irfan Bakit Salim។
ចន្ថាប៊ីន ត្រូវបានដាក់ឲ្យលេងក្នុងតំបន់បម្រើ ដែលជាជំនាញពីកំណើត ពេលលេងក្នុងរហស្សនាមថាអណ្ដើកមួយនេះដោយរូបគេចាប់ដៃគូជាមួយ Lee Tuck និង Kipre Tchetche ឡើងចុះទៅប្រយុទ្ធ និងការពារ។ កីឡាកររូបនេះកើតនៅបារាំងហើយហ្វឹកហាត់បាល់ទាត់នៅក្លឹប RD Strasbourg មុនពេលផ្សងព្រេងមកកម្ពុជាក្នុងឆ្នាំ ២០១២៕
កីឡាករបីនាក់ទៀតដែលគេចាត់ទុកថាអាចជោគជ័យក្នុងអាជីពបាល់ទាត់ម៉ាឡេស៊ីគឺ ៖
ខ្សែបម្រើសិង្ហបុរី FARIS RAMLI,
ខ្សែបម្រើជម្រើសជាតិឥណ្ឌូណេស៊ី Evan Dimas
និងខ្សែប្រយុទ្ធ ILHAM ARMAIYN របស់ឥណ្ឌូណេស៊ី៕
