ក្រុមស្ដេចស Real Madrid នឹងលក់ Gareth Bale ឲ្យប្រសិនបើក្លឹបបិសាចក្រហម Manchester United យល់ព្រមសំណើ៨៥លានផោននេះបើតាមប្រភព Metro។
កីឡាករវ័យ២៨ឆ្នាំលេងក្នុងដំណែងប្រយុទ្ធស្លាបស្ដាំរូបនេះ មិនបានបង្ហាញខ្លួនឲ្យ Real Madrid តាំងពីចុងខែតុលាមកម្ល៉េះ ដោយសាររបួសសាច់ដុំកំភួនជើង។ ប៉ុន្តែរូបគេនឹងអាចត្រឡប់មកវិញក្រោយជាពីរបួស ហើយនឹងអង្គុយកៅអីបម្រុងសិន ព្រោះរូបគេមិនអាចលេងបានភ្លាមនោះទេ។
ប្រភព Sunday Mirror រាយការណ៍ថា Madrid បានធុញទ្រាន់ជាមួយនឹងបញ្ហារបួសដ៏រ៉ាំរ៉ៃរបស់ Bale ហើយពួកគេព្រមទទួលសំណើរ ប្រសើនបើក្លឹបណាមួយដេញថ្លៃយកកីឡាករជម្រើសជាតិវែលរូបនេះទៅ។ បិសាចក្រហម Man Utd មានចំណាប់អារម្មណ៍ចង់បាន Bale យូរមកហើយ ពិសេសលោក Jose Mourinho ធ្លាប់ទម្លាយថា លោកនឹងទិញយក Bale បើកីឡាករម្នាក់នេះត្រូវបានក្លឹបដាក់លក់ឬទំនេរ។
គ្រូបង្វឹកព័រទុយហ្គាល់ចង់ឲ្យ Manchester United ចុះកុងត្រាយកខ្សែប្រយុទ្ធម្នាក់ ប៉ុន្តែពួកគេបរាជ័យក្នុងការទិញយកខ្សែប្រយុទ្ធស្លាប Ivan Perisic ពី Inter Milan។
កុងត្រារបស់ Bale ជាមួយក្រុមស្ដេចសផុតកំណត់នៅឆ្នាំ២០២២ ប៉ុន្តែ Madrid មិនអាចទុកកីឡាកររូបនេះ ដើម្បីតែព្យាបាល់របួសទៀតនោះទេ៕
