ខ្សែប្រយុទ្ធ Chelsea កីឡាករ Alvaro Morata បាននិយាយថា Neymar អាចនឹងមកលេងនៅ Real Madrid នៅថ្ងៃណាមួយហើយក្លឹបអេស្ប៉ាញមួយនេះ មានលទ្ធភាពគ្រប់គ្រាន់ក្នុងការនាំយកកីឡករប្រេស៊ីលមក Bernabeu។
បែបណាក្ដី! Morata ថា Neymar អាចមកលេងនៅ Real តែទាស់ត្រង់ថាពិបាកបន្តិច។ កីឡាករជម្រើសជាតិប្រេស៊ីលមានទំនាក់ទំនងជាមួយនឹងការផ្ទេរមកលេងនៅអេស្ប៉ាញវិញ ខណៈប្រធានក្រុម Real Madrid កីឡាករ Sergio Ramos និយាយថារូបគេពេញចិត្តនឹងបើកទ្វារស្វាគមន៍កីឡាករវ័យ២៥ឆ្នាំរបស់ PSG។
Neymar បានផ្ទេរចេញពី Barcelona ទៅ PSG ក្នុងតម្លៃ២២២លានអឺរ៉ូ កាលពីខែសីហាហើយរកបាន១១គ្រាប់ក្នុងការចូលលេង១២ប្រកួតគ្រប់ពានរង្វាន់ឲ្យក្លឹបលេងនៅ Ligue 1។ ចំណែក Morata ដែលចាកចេញពី Real Madrid ទៅ Chelsea កាលពីខែកក្កដាបាននិយាយថា Neymar មកចូលរួមជាមួយអតីតរបស់ខ្លួនគឺអាចទៅ តែពិបាកបន្តិចហើយ។
“ខ្ញុំគិតថាវាពិតជាពិបាកបន្តិចហើយ ដោយសារតែអតីតកាលរបស់គាត់។ ប៉ុន្តែយើងបានឃើញហើយថា នៅ Real Madrid អ្វីក៏ពួកគេអាចធ្វើបានដែរ” Alvaro Morata និយាយក្នុងកាសែត EL Largero។
ក្រុមរបស់លោក Zidane កំពុងតាមពីក្រោយក្រុមគូប្រជែង Barcelonaដែលឈរកំពូលតារាង៨ពិន្ទុ ឆ្លងកាត់១១ប្រកួតកន្លងមក៕
