របាយការណ៍ពី Daily Mail បានបញ្ជាក់ថា Manchester United បានយល់ព្រមចុះកិច្ចព្រមព្រៀងស៊ីញេកុងត្រា យកយុវជនលេចធ្លោរបស់ Benfica ខ្សែប្រយុទ្ធ Umaro Embalo បន្ទាប់ពីបង្ហាញខ្លួនបានល្អក្នុងកម្រិតយុវជន។
ក្លឹបអេស្ប៉ាញ Real Madrid ក៏មានទំនាក់ទំនងជាមួយកីឡាករវ័យក្មេងម្នាក់នេះដែរ ប៉ុន្តែ Man Utd បានឈ្នះការប្រកួតប្រជែងនេះ ដោយដណ្ដើមបានការចុះហត្ថលេខា បន្ទាប់ពីមានការយល់ព្រមពី Benfica។ Embalo កើតនៅទីក្រុង Bissau ប្រទេសហ្គីណេ ប៉ុន្តែលេងក្នុងជម្រើសជាតិព័រទុយហ្គាល់ក្នុងឈុតយុវជន។
ខ្សែប្រយុទ្ធជំនាញជើងឆ្វេងរូបនេះ រកបានគ្រាប់បាល់១៥គ្រាប់ ក្នុងចំណោម១៨ប្រកួតដែលធ្លាប់លេងឲ្យ U17 ព័រទុយហ្គាល់។ ទម្រង់លេងរបស់គេ គឺខ្សែប្រយុទ្ធស្លាបស្ដាំ ជំនាញជើងឆ្វេង ហើយក្បាច់ញាក់គឺចេញពីស្លាបស្ដាំចូលកណ្ដាល ដែលគេប្រៀបប្រដូចទៅនឹងទម្រង់លេងរបស់ Angel di Maria តែយ៉ាងណាគេសង្ឃឹមថាកីឡាករវ័យក្មេងរូបនេះនឹងទទួលបានជោគជ័យក្នុងអាជីពនៅ Old Trafford ជាងខ្សែប្រយុទ្ធអាហ្សង់ទីន។
លោក Javier Ribalta ប្រធានផ្នែកតាមដានថ្វីជើងកីឡាកររបស់ Man Utd និងលោក John Murtagh ប្រធានផ្នែកអភិវឌ្ឍន៍បច្ចេកទេសក្លឹប បានទៅមើលទម្រង់លេងរបស់ Embalo លេងជាមួយ Benfica U19 ជាមួយ Man Utd U19 កាលពីខែមុនដែលការប្រកួតនេះចប់ដោយលទ្ធផល២-២៕
