ខ្សែការពារស្លាបរបស់ Tottenham កីឡាករ Danny Rose ចង់មកចូលរួម Manchester United ហើយរូបគេនឹងបដិសេធពីការចាប់អារម្មណ៍របស់ Chelsea ហើយប្ដូរមកលេងនៅ Old Trafford នេះបើតាមប្រភពជាច្រើនបានចុះផ្សាយ។
កីឡាករជម្រើសជាតិអង់គ្លេសមិនទាន់បានចូលលេងឲ្យក្រុមរបស់លោក Mauricio Pochettino នោះទេដោយសាររបួសប៉ុន្តែ Ben Davies បានបង្ហាញទម្រង់លេងយ៉ាងល្អក្នុងការជំនួសកន្លែង Rose។ Rose ត្រូវបានក្លឹបពិន័យ២សប្ដាហ៍ក្នុងរដូវកាលនេះ បន្ទាប់ពីរិះគន់ហេដ្ឋារចនាសម្ព័ន្ធប្រាក់ឈ្នួលរបស់ក្លឹប ហើយរូបគេបញ្ជាក់ថាចង់ចេញពីក្លឹប។
លោក Jose Mourinho ក៏មានការពេញចិត្តកីឡាកររូបនេះដែរ ហើយគាត់គិតថាអាចក្លាយជាកីឡាករលេងក្នុងដំណែងការពារស្លាបឆ្វេងរយៈពេលវែងរបស់ United។ លោក Conte ចង់ចុះកុងត្រា Rose លេងក្នុងដំណែងស្លាបឆ្វេងកាលពីរដូវកាលមុន ប៉ុន្តែអតីតកីឡាកររបស់ Leeds ចង់មកលេងនៅ Man Utd ជាង, Daily Star គេនិយាយអញ្ចឹង។
បិសាចក្រហមឲ្យតម្លៃខ្លួន Danny Rose ៤៥លានផោនហើយសង្ឃឹមថានឹងអាចទាញយកមកលេងនៅ Old Trafford មុនការប្រកួត World Cup។ ការមកដល់របស់ Danny Rose មានន័យថាអាជីពរបស់ Luke Shaw នៅ Old Trafford និង United នឹងត្រូវខ្ទាតចេញ ខណៈកុងត្រារបស់គេនៅសល់១២ខែទៀតប៉ុណ្ណោះ៕
