កីឡាករវ័យក្មេងទើបបានចូលលេងឲ្យ Tottenham បានប៉ុន្មានប្រកួត Harry Winks ត្រូវកោះហៅឲ្យចូលក្នុងជម្រើសជាតិអង់គ្លេស ខណៈខ្សែការពារ Phil Jones និង Fabain delph ត្រូវដកចេញដោយសាររបួស។ នេះបើតាមសហព័ន្ធបាល់ទាត់អង់គ្លេសប្រកាស។
Winks វ័យ២១ឆ្នាំត្រូវបានដំឡើងពីឈុត U21 អង់គ្លេសមកលេងនៅឈុតធំសម្រាប់ការប្រកួតវគ្គជម្រុះ World Cup ២ប្រកួតចុងក្រោយ ដោយទទួលភ្ញៀវស្លូវើនៀនៅថ្ងៃព្រហស្បតិ៍ និងធ្វើដំណើរទៅកាន់ទឹកដីលីទុយអានីនៅថ្ងៃអាទិត្យ។
ខ្សែការពារកណ្ដាលរបស់ Manchester United កីឡាករ Phil Jones និងខ្សែបម្រើក្លឹប Manchester City កីឡាករ Fabian Dilph បានត្រឡប់ទៅកាន់ក្លឹបរបស់ខ្លួនវិញដើម្បីធ្វើការព្យាបាល។ FA មិនបានបញ្ជាក់ឲ្យច្បាស់ពួកគេរបួសអីនោះទេ។ លោក Gareth Southgate ក៏នឹងត្រូវបាត់បង់មិត្តរួមក្រុមរបស់ Winks គឺ Dele Alli ទល់នឹងក្រុមស្លូវើនៀដោយសារជាប់បម្រាមប៉ុន្តែរូបគេនឹងមានវត្តមានវិញពេលធ្វើដំណើរទៅកាន់ប្រទេសលីទុយអានី។
អង់គ្លេសកំពុងឈរកំពូលតារាងពូលF ដោយត្រូវការត្រឹមតែ២ពិន្ទុទៀតប៉ុណ្ណោះ ពួកគេនឹងបានឡើងទៅលេងនៅ ប្រទេសរុស្សី៕
