ក្រុមជម្រើសជាតិកម្ពុជានឹងត្រូវជួបក្រុមជម្រើសជាតិឡាវ ក្នុងលក្ខណៈមិត្តភាពអន្តរជាតិនៃកីឡដ្ឋានជាតិឡាវ នៅវេលាម៉ោង៦និង០០នាទីល្ងាចនេះ ខណៈលោកប្រាក់ សុវណ្ណរ៉ាបាននាំកីឡាករជម្រើសជាតិ២៣នាក់ត្រៀមមិត្តភាព និងប្រកួតវគ្គជម្រុះ AFC Asian Cup 2019 ជាមួយអាហ្វហ្គានីស្ថាន។
ក្នុងចំណោមកីឡាករទាំង២៣នាក់ ដែលជ្រើសរើសបានហើយមានកីឡាករវ័យក្មេងជាប់លើកដំបូងខ្លះ និងខ្លះទៀតមានបទពិសោធន៍ជោកជាំក្នុងជម្រើសជាតិយូរមកហើយ។ ការប្រកួតនេះក្រុមកម្ពុជានឹងត្រូវការឈ្នះ ដើម្បីស្វាគមន៍ឆ្នាំ២០១៨ពីព្រោះវាជាការប្រកួតដំបូងគេបំផុតសម្រាប់ឆ្នាំនេះ។
គេមិនទាន់ដឹងថាតើក្នុងការជួបជាមួយឡាវនេះ គ្រូបង្វឹកកម្ពុជាជ្រើសរើសកីឡាករ១១នាក់ដំបូងដោយយកកីឡាករណានោះទេ តែគេហទំព័រអាណាចក្រកីឡាសូមជ្រើសរើសកីឡាករ១១នាក់ជាការទស្សន៍ទាយដល់ប្រិយមិត្តបញ្ចេញមតិយោបល់ មុនពេលជម្រើសដំបូង១១នាក់ផ្លូវការ។
-អ្នកចាំទី៖ កែវ សុខសិលា(វិសាខា)
ពិតណាស់!ការផ្ដល់ឱកាសឲ្យកីឡាករវ័យក្មេងក្នុងការប្រកួតមិត្តភាពបែបនេះ ពិតជាល្អ ហើយកែវ សុខសិលា នឹងអាចក្លាយជាអ្នកសង្គ្រោះបាល់មុខទីជំនួសសិស្សច្បង ស៊ូ យ៉ាទី ដែលមានបទពិសោធន៍ជោកជាំទៅហើយនោះ។
–ខ្សែការពារស្លាបឆ្វេង សឿត បារាំង (ភ្នំពេញក្រោន) ខ្សែការពារកណ្ដាលហុង ផេង (បឹងកេត) សឿយ វិសាល (ព្រះខ័នរាជស្វាយរៀង) ការពារស្លាបស្ដាំ រស់ សំអឿន(វិសាខា)
ចូលលេងជម្រើសដំបូង១១នាក់ឲ្យក្លឹបភ្នំពេញក្រោនក្នុង Metfone Cambodian League រក្សា Clean-Sheet គឺជាការរំពឹងទុកមួយដ៏ល្អ ខណៈសឿត បារាំងក៏ធ្លាប់មានបទពិសោធន៍ក្នុងបង្ហាញខ្លួនឲ្យឈុតធំផងដែរ។ ហុង ផេងទើបជាពីរបួសហើយទើបបានលេងក្នុងរដូវកាលថ្មីនេះ ដោយជួយបឹងកេតឈរកំពូលតារាងលីកកំពូលកម្ពុជា តែយ៉ាងណារូបគេអាចនឹងជាប់ជម្រើសដំបូង១១នាក់ឡើងវិញក្រោយខកខានជាងមួយឆ្នាំ។
សឿយ វិសាល តែងតែងជាប់ជម្រើសដំបូង១១នាក់ក្នុងក្រុមជម្រើសជាតិជារឿយៗនាពេលកន្លងមក ហើយរូបគេតែងតែធ្វើបានល្អ។ ចំណែកការពារស្លាបស្ដាំរស់ សំអឿន នៅតែជាតារាសំខាន់ក្នុងតំបន់នេះ។ ការបង្ហាញទម្រង់លេងឲ្យក្លឹបវិសាខាឡើងជើងក្នុងរដូវកាលនេះ ជាមូលហេតុមួយធ្វើឲ្យប្រាក់ សុវណ្ណារ៉ាដាក់១១នាក់ដំបូង។
បម្រើ៖ ប៊ីន ចន្ថាជារី សុះ ស៊ូហាណា អន ចាន់ប៉ូលីន
ទៅលេងនៅក្លឹប Terengganu FA របស់ម៉ាឡេស៊ី ចន្ថាប៊ីន តែងតែចាប់ជម្រើសដំបូង១១នាក់រហូត ហើយក៏លេងពេញ៩០នាទីរហូតផងដែរ។ ជំនាញលើកបាល់ហ្វ្រីឃីក ចុះមកតំបន់ការពារលឿន គឺគុណសម្បត្តិក្នុងការជាប់ជម្រើសដំបូង។
សុះ ស៊ូហាណា ជាខ្សែបម្រើដែលលេងក្នុងជម្រើសជាតិយូរគួរសម ហើយរូបគេតែងតែធ្វើបានល្អនាពេលកន្លងមកទាំងក្នុងក្លឹបនិងជម្រើសជាតិ។
សម្រាប់ អ៊ន ចាន់ប៉ូលីន វិញហាក់ធ្វើឲ្យប្រិយមិត្តភ្ញាក់ផ្អើលបន្តិច ក្រោយជាប់ជម្រើសទស្សន៍ទាយរបស់អាណាចក្រកីឡា។ កុំភ្លេចថាក្នុងការប្រកួតលីក៣លើកកន្លងមក រូបគេបំពេញតួនាទីបានល្អបំផុតក្នុងតំបន់បម្រើកណ្ដាលរបស់ក្រោន ហើយវាអាចជាឱកាសបង្ហាញសមត្ថភាពក្នុងឈុតធំលើកដំបូងផងសម្រាប់កីឡាករវ័យ១៩ឆ្នាំរូបនេះ។
តំបន់ប្រយុទ្ធ៖ កែវ សុខផេង ចាន់ ឌ្ឍនាកា និងប្រាក់ មុន្នីឧត្តម
លោកប្រាក់ សុណ្ណារ៉ា ធ្លាប់បាននិយាយថាការប្រកួតផ្ដោតសំខាន់ទៅលើលទ្ធផលហើយ ដើម្បីបានលទ្ធផលល្អគ្រាប់បាល់ស៊ុតបញ្ចូលទី។ ការទទួលបានបទពិសោធន៍ថ្មីពីលីកកំពូលម៉ាឡេស៊ីធ្វើឲ្យពួកគេទាំងបីនឹងជាប់ជម្រើសដំបូងក្នុងតំបន់ប្រយុទ្ធ។
សូមបញ្ជាក់ផងដែរថា៖ នេះគ្រាន់តែជាការជ្រើសរើសរបស់គេហទំព័រអាណាចក្រកីឡាតែប៉ុណ្ណោះ វាមិនមែនជាជម្រើសផ្លូវការនោះទេ។សម្រាប់ប្រិយមិត្តវិញនរណាសមជាប់ជម្រើសដំបូង១១នាក់ពេលលេងទល់នឹងឡាវ?
