ការប្រកួតបាល់ទាត់ដណ្ដើមពានរង្វាន់សម្ដេចអគ្គមហាសេនាបតីតេជោ ហ៊ុន សែន (Hun Sen Cup) រដូវកាលឆ្នាំ២០១៧ វគ្គជម្រុះដំណាក់កាលទី៤ នឹងបញ្ចប់ការប្រកួតជើងទី១ របស់ខ្លួនហើយនៅល្ងាចថ្ងៃសៅរ៍ ទី២៤ ខែមិថុនា ឆ្នាំ២០១៧ នេះ ដោយក្រុមណាហ្គាវើល ត្រូវជួបក្រុមខេត្តស្វាយរៀង ហើយក្រុមបឹងកេត ប៉ះខេត្តឧត្តរមានជ័យ។
វគ្គជម្រុះជុំទី៤ នេះមានក្រុមទាំងអស់ចំនួន៨គូហើយក្រុមទាំងនេះបានចាប់គូគ្នា ប្រកួតចំនួន២ជើងដើម្បីស្វែងរកក្រុមខ្លាំងឡើងទៅជុំទី៥ ក្នុងវគ្គ៨ក្រុមចុងក្រោយ។
ចំណែកលទ្ធផលផ្សេងទៀតក្នុងប្រកួតជុំទី៤នេះជើងទី១ ចំនួន៦គូកន្លងមកឃើញថាក្រុមព្រះខ័នរាជស្វាយរៀង យកឈ្នះក្រុមខេត្តកំពត ៨ទល់០ នៅលើទីលានកីឡដ្ឋានខេត្តស្វាយរៀង ហើយក្រុមភ្នំពេញក្រោន យកឈ្នះក្រុមយុវជនសាលាបាល់ទាត់ជាតិបាទី ៦ទល់០ លើទីលានកីឡដ្ឋាន RSN ក្នុងរាជធានីភ្នំពេញ ស្របពេលក្រុមអគ្គស្នងការដ្ឋាននគរបាលជាតិ យកឈ្នះក្រុមសូលទីឡូអង្គរ ៤ទល់១ នៅលើទីលានកីឡដ្ឋានកងយោធពលខេមរភូមិន្ទ និងអាស៊ីអឺរ៉ុប ចាញ់ក្រុមគីរីវង់សុខសែនជ័យ ២ទល់០ នៅនៅទីលានជាមួយគ្នា។ ចំណែកក្រុមក្រសួងការពារជាតិ បានយកឈ្នះក្រុមខេត្តស្ទឹងត្រែង ៦ទល់០ លើទីលានស្តាតចាស់ ស្របពេលក្រុមខេមបូឌានថាយហ្គឺរ បានចាញ់ក្រុមអគ្គីសនីកម្ពុជា ៣ទល់០ លើទីលានខេត្តសៀមរាប។
ចំពោះជើងទី២ វិញនឹងធ្វើធ្វើឡើងនៅ២ថ្ងៃផ្សេងគ្នាដែរដោយប្តូរទាំងដីគ្នាវិញ ដោយថ្ងៃដំបូងធ្វើឡើងនៅថ្ងៃទី១៣ ខែកញ្ញា ហើយថ្ងៃទី២ ធ្វើឡើងនៅថ្ងៃទី១៨ ខែតុលា មុនស្វែងរកក្រុមខ្លាំងចំនួន៨ក្រុមឡើងទៅជុំទី៥។ តាមគម្រោងវគ្គ៨ក្រុមចុងក្រោយនឹងរៀបចំចំនួន២ជើងដែរដោយជើងទី១ ធ្វើឡើងនៅថ្ងៃទី២៥ ខែតុលា ហើយជើងទី២ធ្វើឡើងនៅ ២២វិច្ឆិកា ខណៈវគ្គពាក់កណ្ដាលផ្ដាច់ព្រ័ត្រធ្វើឡើងនៅថ្ងៃទី ២៩ខែវិច្ឆិកា និងថ្ងៃទី២ ខែធ្នូ និងចុងក្រោយវគ្គចំណាត់ថ្នាក់លេខ៣និងវគ្គផ្ដាច់ព្រ័ត្រធ្វើឡើងនៅថ្ងៃទី២៧ ខែធ្នូ ឆ្នាំ២០១៧។
សូមរំលឹកថាពានរង្វាន់សម្តេចតេជោ ហ៊ុន សែន ឆ្នាំ២០១៧នេះមានការប្រកួតជា៥ដំណាក់កាលដោយប្រើពេលជាង១០ខែ ចាប់ពីថ្ងៃទី ១៨ ខែមករា ដល់ថ្ងៃទី២៧ ខែធ្នូ ឆ្នាំ២០១៧ ខណៈការប្រកួតដំណាក់កាលទី១ និងទី២ ជាវគ្គជម្រុះតាមបណ្តារខេត្ត ហើយវគ្គទី៣ជាការប្រកួតរវាងក្រុមជើងខ្លាំងតាមខេត្តជួបក្រុមលីគលំដាប់ទី២ និងក្រុម៤ក្រុមបាតតារាងនៃពានរង្វាន់លីគកំពូលកម្ពុជា ឆ្នាំចាស់ ហើយវគ្គទី៤ ជាការប្រកួតរវាងក្រុមខ្លាំងជាងគេ៦នៅក្នុងលីគជាមួយក្រុមខ្លាំងមកពីជុំទី៣ និងចុងក្រោយជុំទី៥ ជាការប្រកួតចាប់ពីវគ្គ៨ក្រុមចុងក្រោយដល់វគ្គផ្ដាច់ព្រ័ត្រ៕
