ខ្សែការពារដែលជាប្រធានក្រុម Chelsea និងជម្រើសជាតិអង់គ្លេស Gary Cahill កំពុងប្រឈមនិងការបាត់បង់កៅអីរបស់ខ្លួននៅក្នុងក្រុមជម្រើសជាតិដែលត្រូវលេង World Cupនៅរុស្សី ដោយសារតែបង្ហាញទម្រង់លេងមិនបានល្អជាមួយក្លឹប។
សារព័ត៌មានTimes បានចុះផ្សាយថា អ្នកចាត់ការក្រុមតោកំណាចអង់គ្លេសគឺលោក Gareth Southgate មានការព្រួយបារម្ភចំពោះកីឡាករសំខាន់របស់ខ្លួនម្នាក់នេះ ដោយសារក្នុងរដូវកាលនេះ រូបគេលេងពុំសូវបានល្អ និង បង្កអោយមានកំហុសជាច្រើនដងក្នុងការការពារនៅមុខទីដែលបណ្ដាលអោយក្រុមតោខៀវមានចន្លោះប្រហោង និងបាត់បង់ពិន្ទុជាញឹកញាប់។
ក្នុងការប្រកួត Champion League ជាមួយ Barcelona កាលពីពេលថ្មីៗនេះ Cahill ត្រូវលោក Conte ដាក់អោយអង្គុយបម្រុង និងពុំត្រូវបានប្ដូរចូលនោះទេ ដោយសារពុំទុកចិត្តលើសមត្ថភាពរបស់គេ។ ទោះបីមិនសូវជោគជ័យជាមួយក្លឹប តែក្រោមការដឹកនាំរបស់លោក Southgate , Cahill បានបង្ហាញខ្លួនគ្រប់ការប្រកួតទាំងអស់ អោយក្រុមជម្រើសជាតិសរុបចំនួន៧ដង ហើយបានធ្វើជាប្រធានក្រុមកាលពីលេងមិត្តភាពជាមួយអាល្លឺម៉ង់ថែមទៀត។
សម្រាប់កីឡាករវ័យ៣២ឆ្នាំរូបនេះ ការបង្ហាញខ្លួននៅ World Cup លើកនេះនឹងក្លាយជាឱកាសលើកចុងក្រោយដើម្បីកសាងសមិទ្ធផលណាមួយជាមួយក្រុមជម្រើសជាតិ ទោះបីជាក្រុមអង់គ្លេសមានភាគរយតិចក្នុងការលើកពានក៏ដោយ៕
90min.com
