អតីតគ្រូបង្វឹកបិសាចក្រហម Manchester United លោក Luis van Gaal នៅតែបន្តបង្កសង្គ្រាមពាក្យសម្ដី ជាមួយនឹងអតីតក្លឹបរបស់គាត់ ដោយលោករិះគន់ទង្វើគ្រាប់យ៉ាងដែលក្លឹបបច្ចុប្បន្នធ្វើដាក់ Daley Blind ហើយលោកបានប្រាប់កីឡាករ ថាគួរតែផ្ទេរទៅលេងនៅ Barcelona វិញល្អជាង។
កាលពីមុនគ្រូបង្វឹកសញ្ជាតិហូឡង់ ដែលបានចាកចេញកាលពីឆ្នាំ២០១៦បានរិះគន់ទម្រង់លេងរបស់ Manchester United ថាប្រើទម្រង់លេងបែបការពារគួរឲ្យធុញទ្រាន់។ មកដល់ពេលនេះលោកបាន ផ្ដល់យោបល់ឲ្យអតីតកូនក្រុមរបស់លោក Daley Blind ឲ្យពិចារណាចាកចេញពី Man Utd វិញ។
និយាយពីសាមីខ្លួនកីឡាករវិញទើបតែបានលេងក្នុងជម្រើសដំបូង៣ដងប៉ុណ្ណោះក្នុងរដូវកាលនេះ ហើយ៨ប្រកួតចុងក្រោយគ្មានឈ្មោះក្នុងបញ្ជីត្រូវលេងរបស់លោក Jose Mourinho ផងទេ។ អតីតគ្រូបង្វឹក Bayern Munich គឺជាអ្នកគាំទ្រ Blind ដ៏ងប់ងល់ ហើយគាត់នេះហើយដែលបានទិញខ្សែការពារស្លាប់រូបនេះ ក្នុងតម្លៃ១៣.៨លានផោនកាលពីឆ្នាំ ២០១៤។
មួយរយៈកាលចុងក្រោយរូបគេក៏មានព័ត៌មានថា Barcelona ចង់បានក្នុងរដូវកាលដោះដូរកីឡាករខាងមុខនេះដែរ។ដូច្នេះហើយបានជា Van Gaal គ្មានមន្ទិលណាមួយដែលថា មិនឲ្យកីឡាករវ័យ២៧ឆ្នាំចាកចេញនោះទេ។
“Daley Blind នឹងប្រសើរជាងនេះបើទៅលេងនៅ Barcelona ជាជាងបន្តនៅ Man Utd ។ពេលខ្លះគាត់គ្មានឈ្មោះ សូម្បីតែបម្រុង Daley អាចលេងលើសពីមួយតំណែង ហើយនៅ Barcelona គាត់នឹងជោគជ័យ”។ Van Gaal និយាយក្នុងកាសែតMirror។
“ខ្ញុំគិតថា Daley នឹងសាកសមរបស់ Barcelona ជាង។ កម្រិតរបស់គាត់ និងស្ដាយ៍លេងរបស់គាត់ សាកសមនៅអេស្ប៉ាញជាជាងនៅអង់គ្លេស។ គាត់អាចលេងក្នុងដំណែងការពារកណ្ដាល ឡើងមកបម្រើការពារ ហើយប្រយុទ្ធក្នុងដំណែងស្លាបឆ្វេង។ Daley អាចធ្វើបានទាំងអស់”៕
