ខ្សែប្រយុទ្ធរបស់ Liverpool កីឡាករ Sadio Mane ប្រាប់ថា ក្រុមហង្សក្រហមមួយនេះ មិនខ្លាចក្រុមណាទាំងអស់ ទាំងនៅអង់គ្លេស និងនៅ Champion League។
ខណៈដែលនៅក្នុងលីក Liverpool កំពុងឈរនៅលេខ៣ តាមពីក្រោយបិសាចក្រហម២ពិន្ទុ ប៉ុន្ដែពួកគេលេងចាញ់តែម្ដងគត់ ក្នុងចំណោម១៩ប្រកួតចុងក្រោយ។ ចំណែកក្នុងពានអឺរ៉ុប UEFA Champion League វិញ Liverpool បានសម្លឹងឃើញកៅអីវគ្គ៨ក្រុមរួចទៅហើយ ក្រោយពេលលត់ FC Porto ៥ទល់០។
គិតត្រឹមពេលនេះ Liverpool បានស៊ុតបញ្ចូលទីគូប្រកួតបាន១០៣គ្រាប់ហើយ ដោយជាប់កំណត់ត្រាជាក្រុមរកបានគ្រាប់បាល់ដ៏ច្រើនហើយកីឡាករ Mohamed Salah ម្នាក់ឯងស៊ុតបានរហូតដល់ទៅ៣១គ្រាប់។ ភាពខ្លាំងក្លានេះ គឺដោយសារតែពួកគេមានខ្សែប្រយុទ្ធឆ្នើមទាំងបីនាក់គឺ Mohamed Salah, Sadio Mane និង Roberto Firmino។
Mane បាននិយាយថា ៖”ខ្ញុំអាចមើលដឹងថា ពួកយើងកំពុងដើរលើផ្លូវមួយដ៏ត្រឹមត្រូវ។ កាលពីប៉ុន្មានឆ្នាំមុនពួកយើងធ្វើមិនបានល្អនោះទេ ប៉ុន្ដែពេលនេះ អ្វីៗបានផ្លាស់ប្ដូរហើយ”។
“និយាយក្នុងពេលនេះយើង កំពុងស្ថិតលើផ្លូវដ៏ល្អហើយអ្វីៗគ្រប់យ៉ាងគឺអាចទៅរួច។ ខ្ញុំគិតថាយើងបានពង្រឹងខ្លួនឯងច្រើនណាស់មកហើយក្នុងរយៈពេល២ទៅ៣ខែចុងក្រោយនេះ។ ពួកយើងមានអារម្មណ៍ថា ថ្ងៃល្អរបស់យើងគឺអាចយកឈ្នះលើគូប្រកួតទាំងអស់នៅលើលោកនេះ”។
Besoccer
