ការរកគ្រាប់បាល់បញ្ចូលទីគឺជាជីវិតរបស់ខ្សែប្រយុទ្ធជាច្រើន ហើយពិសេសជាងនេះទៀត អ្នករកគ្រាប់បាល់ដូចជា Cristiano Ronaldo ។ បន្ទាប់ពីរកបាន២គ្រាប់ឲ្យ Real Madrid ឈ្នះ Dortmund តារាបាល់ទាត់ជម្រើសជាតិព័រទុយហ្គាល់ ត្រូវបានសួរអំពីកុងត្រាថ្មីរបស់គាត់ ប៉ុន្តែគាត់បានដាក់ការពិភាក្សានេះ ទៅលើថ្នាក់ដឹកនាំ Real Madrid ជាអ្នកសម្រេច។
ក្រោយចប់ការប្រកួត CR7 និយាយដូច្នេះ៖” វាគឺជាសំណួរមួយដែល ប្រធានក្លឹបដឹងបំផុតដើម្បីឆ្លើយ។ ខ្ញុំរីករាយគ្រប់យ៉ាងនៅទីនេះ”។
បន្ថែមពីនេះកីឡាករបាននិយាយបដិសេធគាត់ចង់ចាកចេញពីម្ចាស់ជើងឯក អឺរ៉ុបក្នុងរដូវកាលនេះ៖” តើពួកគេនិយាយអ្វីពីCristiano Ronaldo? អ្នកមិនបានលឺការនិយាយពីមាត់ខ្ញុំនោះទេ ពួកគេនិយាយក្នុងប្រទេសព័រទុយហ្គាល់ អាល្លឺម៉ង់ និងជុំវិញពិភពលោក។ ពីព្រោះតែពួកគេនិយាយពីខ្ញុំរាល់ថ្ងៃ។”
“ អ្វីគ្រប់យ៉ាងដែលធ្វើជាមួយឈ្មោះ Cristiano Ronaldo គឺព័ត៌មានជុំវិញពិភពលោក។ពេលដែលអ្នកល្បី និងធំពួកគេនិយាយពីអ្នកប្រសិនបើខ្ញុំចង់ឆ្លើយតបទាំងអស់ទៅកាន់ពួកគេគឺខ្ញុំគួរតែឡាយផ្ទាល់តាមបណ្ដាញផ្សព្វផ្សាយ ប៉ុន្តែខ្ញុំរស់នៅសម្រាប់បាល់ទាត់និងសម្រាប់គ្រួសាររបស់ខ្ញុំសល់ពីនេះមិនសំខាន់”៕
