តាមប្រភព Daily Mail បានឲ្យដឹងថា Real Madrid នៅតែចិញ្ចឹមចិត្តចង់បានខ្សែប្រយុទ្ធ Eden Hazard ពី Chelseaរៀងរហូតទោះបីចំណាយពេលយូរប៉ុណ្ណាក៏ដោយពីព្រោះលោក Zidane ពេញខ្លាំងលើកីឡាកររូបនេះ។
កាសែតអង់គ្លេសខាងលើបានរាយការណ៍ថាខណៈដែល Real Madrid នៅតែចាប់អារម្មណ៍ប៉ុន្តែពួកគេមិនទាន់បានដាក់សំណើអីមួយទៅឲ្យ Chelsea ពិនិត្យនោះឡើយដោយមានន័យថា ចាប់ចិត្តស្រឡាញ់តែមិនឈានដល់ម៉ែឪ។
ការចង់បាននេះគឺដើម្បីត្រៀមទុកជំនួស Ronaldo ដែលមានវ័យចាស់ទៅហើយខណៈពេលដែល Gareth Bale ក៏មានអនាគតមិននឹងធឹងជាមួយ Real Madrid នោះទៀត។គេបានដឹងថាយ៉ាងហោចណាស់ Hazardមានតម្លៃខ្លួនផ្ដាច់កុងត្រា១០០លានដែរប៉ុន្តែដោយសាររូបគេ មានវ័យក្មេងជាង Ronaldo ដល់ទៅ៦ឆ្នាំពួកគេនឹងអាចឈានដល់ម៉ែឪ (Chelsea)នាពេលអនាគត។
ក្នុងរដូវកាលនេះប្រធានក្រុមជម្រើសជាតិបែលហ្សិករកបាន១៥គ្រាប់ក្នុងការបង្ហាញខ្លួន៤២ប្រកួតហើយស្ថិតិនេះ វាមិនបានធ្វើឲ្យ Real Madrid ភ្ញាក់ផ្អើលនោះទេគឺពួកគេនៅតែរក្សាកីឡាករវ័យ២៧ឆ្នាំរូបនេះក្នុងបញ្ជីទិញរបស់ខ្លួនដដែល៕
