ប្រភពជាច្រើនបានរាយការណ៍ថាក្រុមស្ដេចស Real Madrid កំពុងមានបំណងលក់ Karim Benzema ឲ្យទៅក្រុមហង្សក្រហម Liverpool នេះបើតាមប្រភពពីគេហទំព័រ Daily Starរបស់អង់គ្លេស នឹង Diario Gol របស់អេស្ប៉ាញ។
កីឡាករសញ្ជាតិបារាំង លេងមិនសូវបានល្អទេ កាលពីរដូវកាលមុនហើយមានពេលខ្លះល្អហើយខ្លះទៀត មិនសូវល្អ ដោយរកគ្រាប់បាល់បាន១១គ្រាប់គ្រប់កម្មវិធីប្រកួត។ ប្រភពខាងលើបាននិយាយថា កីឡាករវ័យ២៩ឆ្នាំប្រឈមនឹងចាកចេញពី Real Madrid ហើយក្លឹបដែលមានទំនាក់ទំនងចង់បានគឺ Liverpool ខ្លាំងជាងគេ Arsenal និងក្លឹបអាល្លឺម៉ង់ Borussia Dortmund ខណៈក្លឹបទាំងនេះសុទ្ធតែដាក់សំណើមកកាន់ Real Madrid ។
ទោះបីជាយ៉ាងនេះក្ដី! លោក Florentino Perez មានចំណាប់អារម្មណ៍លក់កីឡាករបារាំងរូបនេះទៅឲ្យ Liverpool។ Dairio Gol សរសេរថា Real Madrid បានដាក់តម្លៃឲ្យហង្សក្រហមពិចារណាសិន គឺមានដល់ទៅ៩២លានផោនក្នុងរដូវក្ដៅនេះ។ ក្រោយក្លឹបលក់កីឡាកររូបនេះដាច់ លោក Perez នឹងប្រមូលលុយយកទៅទិញកីឡាករបារាំងម្នាក់ទៀត Kylian Mbappe។
ម្ចាស់ក្លឹបស្ដេចសមួយនេះ ចង់បានកីឡាករវ័យក្មេងរបស់ Monaco មកចាប់ដៃគូក្នុងតំបន់ប្រយុទ្ទជាមួយ C. RonaldoនិងGareth Bale។ Benzema នឹងអាចក្លាយជាកីឡាករទី៤ដែល Liverpool ស៊ីញេកុងត្រា។ រូបគេនឹងទៅតាមក្រោយ Mohamed Salah, Dominic Solanke និង Andrew Robertson នៅ Anfield៕
