គ្រូបង្វឹកក្លឹបមានខ្នាយមាស Spurs លោក Mauricio Pochettino ជឿថាការប្រកួតប្រជែង ដើម្បីពាន Premier League ខ្លាំងពេក ធ្វើឲ្យការដណ្ដើមពានលំដាប់អឺរ៉ុបរបស់ក្រុមមកពីអង់គ្លេសតែងតែងធ្លាក់ជាបន្តបន្ទាប់។
កាលពីរដូវកាលមុនក្រុមរបស់លោកបានធ្លាក់វគ្គជម្រុះក្នុងពូល Champions League ប៉ុន្តែសម្រាប់ពាន Premier League វិញលើកពិតធ្វើបានល្អ ដោយជួយក្លឹបឈរលេខ២ក្នុងតារាងលីកមាន៨៦ពិន្ទុ ដែលជាកំណត់ត្រាពិន្ទុខ្ពស់បំផុតក្នុងប្រវត្តិសាស្រ្តក្លឹប។
ក្លឹបអង់គ្លេសដទៃទៀតក៏មានស្ថានភាពមិនខុសគ្នាដែរ ដោយមិនដែលបានឡើងវគ្គផ្ដាច់ព្រ័ត្រចាប់តាំងពី Chelsea ឈ្នះBayern Munich កាលពីឆ្នាំ២០១២ ហើយក្លឹបទាំងនេះបានត្រឹមវគ្គ៤ក្រុមចុងក្រោយ២ដងប៉ុណ្ណោះក្នុងរយៈកាល៥រដូវកាលចុងក្រោយនេះ។
លោក Pochettino បានដាក់ការធ្លាក់ចុះនៃគុណភាពប្រជែងពានលំដាប់អឺរ៉ុបរបស់ក្រុមមកពីអង់គ្លេសថា ជាវប្បធម៌ខុសគ្នានៃការប្រកួតប្រជែងក្នុងPremier League។
“ Premier League គឺជាការប្រកួតប្រជែងចម្បងគេ សម្រាប់កីឡាករគ្រប់គ្នាដែលលេងនៅ Premier League។ អារម្មណ៍ចង់ឈ្នះ Champions League នៅអ៊ីតាលី គឺជាការប្រកួតប្រជែងដ៏ធំបំផុតក្នុងពិភពលោក។ ប៉ុន្តែនៅអង់គ្លេស Premier League គឺជាពានសំខាន់បំផុត បន្ទាប់មកគឺ FA Cup។ Champions League និង Europa League ក៏សំខាន់ដូចគ្នាតែស្ថិតក្នុងកម្រិតខុសគ្នា។ នេះពិតជាពិបាកពន្យល់ឲ្យបានក្បោះក្បាយ។ ពេលដែលអ្នកនៅប្រទេសអង់គ្លេសអ្នកអាចគិតថា Premier League សំខាន់ជាងអ្វីទាំងអស់ ពិសេសសម្រាប់ក្លឹបនីមួយៗ។”
“ ក្នុងប្រទេសអេស្ប៉ាញ និងអ៊ីតាលីពួកគេគិតដល់ Champions League មុនគេជាជាងពានក្នុងស្រុក ហើយក្រុមដែលស្ថិតក្នុងលំដាប់ក្រោមហ្នឹងបន្តិចគេគិតដល់ Europa League ជាងពានក្នុងស្រុក នេះគឺជាការពិត។ អ្នកអាចយល់ ដោយសារតែ Premier League ជាលីកដ៏តឹងតែង មានការចាប់អារម្មណ៍ខ្លាំង និង ជាលីកដ៏អស្ចារ្យក្នុងពិភពលោក។”
លោកបានបន្តថា៖ “ អ្នកមិនអាចផ្លាស់ប្ដូរបានទេ! នេះគឺអង់គ្លេស វប្បធម៌នៅទីនោះដោយឡែក ហើយត្រូវតែក្លាហានទទួលយក និងប្រកួតប្រជែងក្នុងមធ្យោបាយផ្សេងៗគ្នា”៕
