ត្រឹមវ័យ២៥ឆ្នាំ Neymar ទទួលបានកាតពិន័យក្នុងអាជីពបាល់ទាត់ច្រើនជាង Pepe ដែលបច្ចុប្បន្នកំពុងលេងនៅ Besiktas ហើយពិភពលោកចាត់ទុកថា ជាកំពូលកីឡាករបាល់ទាត់លេងកាចជាងគេបំផុតក្នុងតំបន់អឺរ៉ុប។
ទោះបីជាគេចាត់ទុកថា ជាកីឡាករមានទេពកោសល្យជាងគេបំផុតក្នុងភពផែនដីយើងនេះ Neymar នៅតែបង្កើតភាពភ្ញាក់ផ្អើល ពិសេសស្ថិតិនៃការទទួឡបានកាតពិន័យបាល់ទាត់។ ចាប់ផ្ដើមចេញពីកីឡាករអាជីពពេញលេញនៅក្លឹប Santos មកដល់ PSG បច្ចុប្បន្ន Neymar ទទួលបានកាតក្រហមពិន័យដេញចេញពីការប្រកួត៨ដង ខណៈកាតលឿងទទួលបាន១៣៨កាត ដែលនេះគឺជាចំនួនមួយដ៏ច្រើនលើសលប់ ទោះបីជាលេងក្នុងតំបន់ប្រយុទ្ធក៏ដោយ។
ចំនួននេះវាច្រើនជាងកាតក្រហម និងលឿងរបស់ Pepe ដែលលេងក្នុងតំបន់ការពារហើយត្រូវរ៉ាប់រងបិទខ្សែប្រយុទ្ធគ្រាប់ស្ថានការណ៍។ វ័យ៣៤ឆ្នាំ Pepe បានការលឿងត្រឹមតែ១១៩ និងកាតក្រហមត្រឹមតែ៦ដងប៉ុណ្ណោះ។
ចំណែកកីឡាករដែលទទួលបានកាតលឿង និងក្រហមច្រើនជាងគេបំផុតនាពេលបច្ចុប្បន្ននេះគឺ Sergio Ramos វ័យ៣១ឆ្នាំដោយទទួលបាន ២២១កាតលឿង និង២៣កាតក្រហមគិតទាំង កាលលេងនៅ Sevilla, Real Madrid និងជម្រើសជាតិអេស្ប៉ាញ។ អ្វីដែលគេចង់ដឹងបំផុតនោះគឺ ពេលNeymar មានវ័យ៣០ឆ្នាំជាងប្រហែល Pepe និង Ramos តើទទួលបានកាតលឿងនិងក្រហមប៉ុន្មាន?៕
