Lionel Messi ទើបតែបានប្រាប់ការពិតអំពីរឿងរ៉ាវកាលពីគាត់នៅក្មេង ដែលធ្វើអោយមនុស្សគ្រប់គ្នាមានការអាណិតជាពន់ពេក។កាលពីនៅវ័យកុមារ Messi ត្រូវទទួលរងការឈឺចាប់ដែលបណ្ដាលមកពីបញ្ហាអរម៉ូន ដែលធ្វើអោយខ្លួនប្រាណមានការលូតលាស់យឺត។

វាជារឿងដ៏ពិបាកដែលកុមារក្រីក្រម្នាក់ត្រូវប្រឈមមុខ។ ការព្យាបាលនាសម័យនោះ តម្រូវអោយមានការចាក់ថ្នាំ ដោយប្រើម្ជុលជាប្រចាំដើម្បីកាត់បន្ថយការឈឺចាប់ក្នុងសាច់ដុំ។ Messi បានអោយដឹងថា៖” ខ្ញុំបានចាប់ផ្ដើមចាក់ថ្នាំនោះ តាំងពីអាយុ៨ឆ្នាំ ដោយឳពុកម្ដាយខ្ញុំជាអ្នកចាក់ឲ្យ។ ពេលចាក់ទៅមិនឈឺនោះទេ ព្រោះវាគ្រាន់តែជាម្ជុលតូចមួយប៉ុណ្ណោះ។ ពេលអាយុ១២ឆ្នាំ ខ្ញុំក៏រៀនចាក់ដោយខ្លួនឯង។ ពេលនោះខ្ញុំត្រូវចាក់លើ​ជើងទាំងសងខាងជារៀងរាល់យប់។ វាមិនមែនជារឿងដែលធ្វើអោយខ្ញុំសប្បាយចិត្តនោះទេ”។

នៅអាយុ១៣ឆ្នាំ Messi បានធ្វើដំណើរជាមួយក្រុមគ្រួសារមកកាន់ទីក្រុង​​ Barcelona ដើម្បីកសាងជីវិតថ្មី គឺនៅឆ្នាំ២០០១។ មកដល់ទីនេះ Messi បានចូលហាត់ជាមួយឈុតយុវជនរបស់ Barcelona និងត្រូវបានក្លឹបជួយព្យាបាលជម្ងឺរហូតជាសះស្បើយ។

ប៉ុន្ដែជីវិតនៅកន្លែងថ្មីដែលឆ្ងាយពីស្រុកកំណើត មិនមែនងាយស្រួលនោះទេ ម្ដាយ និងបងប្អូនរបស់ Messi បាននាំគ្នាត្រលប់ទៅកាន់ប្រទេសអាហ្សង់ទីនវិញ ដោយបន្សល់ទុកតែរូបគេ និងឳពុកអោយស្នាក់នៅបន្ដទៀត។ ពេលនោះឳពុករបស់ Messi បានសួរគេថា តើយើងគួរធ្វើអ្វីបន្ដ? គេបានប្រាប់ទៅឳពុកវិញថា ខ្ញុំចង់នៅទីនេះបន្ដទៀត។ នៅឆ្នាំ ២០០៥ Messi បានចាប់ផ្ដើមចូលលេងអោយក្រុមឈុតធំរបស់ Barcelona និងទទួលបានជោគជ័យជាបន្ដបន្ទាប់រហូតមក៕

The Sun