ខ្សែបម្រើស្លាបរបស់ Real Madrid កីឡាករ Marco Asensio មិនបានបង្ហាញការចាប់អារម្មណ៍ប្ដូរទៅលេងនៅក្លឹបបារាំង PSG នោះទេ ខណៈរូបគេក៏ធ្លាប់ត្រូវបាន Barcelona ចាប់អារម្មណ៍កាលនៅជាយុវវ័យ។
Asensio វ័យ២១ឆ្នាំបានបង្ហាញថ្វីជើងយ៉ាងល្អគួរឲ្យភ្ញាក់ផ្អើលក្នុងដើមរដូវកាលនេះ ដោយទាត់បញ្ចូលទីបាន៤គ្រាប់ក្នុង៦ប្រកួតគ្រប់ពានរង្វាន់ឲ្យ Real Madrid ។កីឡាករជម្រើសជាតិអេស្ប៉ាញដែលបានមកដល់ Real Madrid ក្រោយចាកចេញពីក្លឹប Mallorca ក្នុងឆ្នាំ ២០១៤ ធ្លាប់ត្រូវបានពិចារណាថា ជាកីឡាករវ័យក្មេងមានទេពកោសល្យដ៏ភ្លឺស្វាងក្នុងពិភពលោក។
បែបណាក្ដី! ក្នុងពេលថ្មីៗនេះ រូបគេមានព័ត៌មានជាប់ទាក់ទងទៅលេងនៅPSG ប៉ុន្តែរូបគេសប្បាយចិត្តដែលនៅលេងជាមួយ Real Madrid ។ និយាយក្នុងកាសែត COPE, Asensio និយាយដូច្នេះ៖” ខ្ញុំមិនដឹងថាខ្ញុំមានតម្លៃនោះទេជាមួយនឹងតម្លៃខ្លួនផ្ដាច់កុងត្រានោះ។ ប្រសិនបើខ្ញុំទៅលេងនៅ PSG ? មិនអាចទេ ដោយសារតែខ្ញុំរីករាយនៅជាមួយ Real Madrid ។”
” ខ្ញុំចាប់ផ្ដើមលេងជម្រើសដំបូងនៅ Mallorca ហើយ Barcelona បានចាប់អារម្មណ៍ខ្ញុំ។ចុងបញ្ចប់វាមិនមែនជាក្លឹប Barca នោះទេហើយខ្ញុំត្រូវបានលើកតម្កើងនៅ Madrid ហើយខ្ញុំនឹងការពារអាវសមួយនេះជារៀងរហូត។ ពេលដែលHoracio ខលមកខ្ញុំហើយគាត់និយាយថា Real Madrid ចាប់អារម្មណ៍ខ្ញុំ ខ្ញុំនិយាយថាទៅលេងតែម្ដងទៅ មិនបាច់គិតច្រើនទេ។”
