នៅ​ពេល​ដែល Real Madrid ឈ្នះ​ពានរង្វាន់ប្រចាំទ្វីបអឺរ៉ុបលើក​ទី១០របស់​ខ្លួន​កាល​ពី​ឆ្នាំ២០១៤ សារមន្ទីរ​ក្លឹប​បាន​សម្រេច​បង្កើន​កន្លែងចំនួន​ពីរ​ទៀត ដើម្បី​សម្រាប់​ដាក់​តាំង​ពាន​កំពូល​អឺរ៉ុប​មួយ​នេះ។ យ៉ាង​នេះ​ក្ដី ការ​ឈ្នះ​ពានខាងលើនេះនារដូវ​កាល ២០១៥/១៦ និង ២០១៦/១៧ មាន​ន័យ​ថាកន្លែងនៅសល់ទាំង​នោះ​គឺពេញ​ហើយ ជាហេតុធ្វើឲ្យ​សារមន្ទីរ​របស់ក្លឹប​កំពុង​ជួប​បញ្ហា​ខ្វះ​កន្លែង​ដាក់ពានទី១៣ដែល​ទើប​ឈ្នះ។

បើ​តាម​ការ​ចុះ​ផ្សាយ​របស់​ Marca អ្នក​គាំទ្ររបស់ក្រុមជើងឯក UCL ១៣សម័យ ត្រូវ​រង់​ចាំ​ដល់​ទៅ ១ សប្ដាហ៍ទៀត ​ដើម្បី​ទស្សនា​លោក​ប្រធាន​ក្លឹប Florentino Perez ធ្វើ​ពិធី​ដាក់​តាំង​ពាន​ថ្មី ដូច​សព្វ​ដង។ បើ​តាម​ការរាយការណ៍របស់​សារព័ត៌មាន Bleacher Report ក្លឹប​ Real Madrid កំពុង​រៀប​ចំ​កន្លែងសម្រាប់​ដាក់​តាំង​ពាន Champions League ទី១៣។

គួររំលឹកថា Real Madrid បាន​យក​ឈ្នះ Liverpool ក្នុង​លទ្ធផល ៣-១ ក្នុង​ព្រឹត្តិការណ៍ UEFA Champions League វគ្គ​ផ្ដាច់ព្រ័ត្រ ដែលធ្វើឲ្យពួកគេជាក្រុមដែលលើក​ពាន​កម្មវិធី​មួយ​នេះ​ដល់​ទៅ ៤ លើក​ក្នុង​ ៥​ឆ្នាំ​ចុង​ក្រោយ៕