គ្រូបង្វឹក Spurs លោក Mauricio Pochettino បាននិយាយថា គាត់គួរតែទៅធ្វើការក្នុងកសិដ្ឋាន ជាជាងទៅដឹកនាំក្រុមArsenalឬក៏ Barcelona។
គ្រូបង្វឹកសញ្ជាតិអាហ្សង់ទីន បាននិយាយថាគ្មានផ្លូវដែលលោកនឹងទៅដឹកនាំក្រុមណាមួយ ដែលជាគូរប្រជែងក្លឹបដែលលោកធ្លាប់ដឹកនាំនោះទេ ដូចជាលោកធ្លាប់កាន់ការងារនៅ Espanyol មានន័យថា លោកនឹងមិនចាប់អារម្មណ៍ទៅកាន់តួនាទីនៅ Barcelona ដែរ។
វាជាការព្រួយបារម្ភរបស់អ្នកគាំទ្រក្លឹបមាន់ខ្នាយមាស ទោះបីជាយ៉ាងនេះក្ដី! Pochettino នឹងមិនបដិសេធនោះទេ បើ Real Madrid ចាប់អារម្មណ៍។ ខណៈដែលម្ចាស់ជើងឯក Champions League អាចនឹងចែកផ្លូវគ្នាជាមួយ Zidane ដោយសារក្លឹបធ្លាក់ចុះឥទ្ធិពល និងទម្រង់លេងនោះ ភាពស្មោះត្រង់របស់លោកនៅ Tottenham អាចនឹងត្រូវសាកល្បងឆាប់ៗនេះ។
“អ្នកមិនដឹងថា នឹងមានរឿងអ្វីកើតឡើងនៅក្នុងពិភពបាល់ទាត់នោះទេ ” លោក Pochettino បាននិយាយ ក្នុងសន្និសីទកាសែតមួយ។
“ ខ្ញុំនឹងមិនទៅដឹកនាំ Barcelona ឬក៏ Arsenal នោះទេ ដោយសារខ្ញុំបានកំណត់អត្តសញ្ញាណជាមួយ Tottemham និងEspanyol។ ខ្ញុំធំធាត់ឡើងជាមួយ Newell’s Old Boys ហើយខ្ញុំក៏មិនទៅដឹកនាំគូរប្រជែង Rosario Central ដែរ”។
“ នេះគឺជាការសម្រេចចិត្តរបស់ខ្ញុំ។ ខ្ញុំសុខចិត្តទៅធ្វើការនៅកសិដ្ឋាន របស់ខ្ញុំនៅអាហ្សង់ទីន ជាជាងទៅដឹកនាំក្លឹបទាំងនោះ”៕
