ប្រធានក្លឹប Real Madrid លោក Florentino Perez បានទទូចថាក្លឹបគ្មានគោលបំណងចុះកុងត្រាយកខ្សែប្រយុទ្ធ Tottenham កីឡាករ Harry Kane ដែលមានតម្លៃខ្លួនដល់ទៅ២៥០លានអឺរ៉ូនោះទេ។
កីឡាករជម្រើសជាតិអង់គ្លេសកំពុងតែឡើងជើងខ្លាំង ទាំងនៅក្នុងក្លឹបនិងជម្រើសជាតិដោយបង្ហាញខ្លួន៤០ប្រកួតរកគ្រាប់បាល់បាន៤០គ្រាប់។ សមត្ថភាពរកគ្រាប់បាល់បែបនេះ ធ្វើឲ្យរូបគេជាប់ទាក់ទងប្ដូរទៅ Real Madrid ខណៈរបាយការណ៍មកពីអេស្ប៉ាញបញ្ជាក់ថា Perez បាននិយាយទាក់ទងរឿងទិញដូរកីឡាករអំឡុងជួបគ្នាដោយលទ្ធផលស្មើ១-១ Champions League។
ផ្ទុយទៅវិញ! ប្រធានក្លឹបម្នាក់នេះ បាននិយាយបដិសេធព័ត៌មានថា លោកគ្មានបំណងទិញ Harry Kane ក្នុងតម្លៃខ្ពស់បំបែកកំណត់ត្រាពិភពលោកបែបនេះទេ។
“ការចុះកុងត្រាយក Harry Kane មិនអាចរំលងក្បាលខ្ញុំបានទេ។ គាត់ជាកីឡាករដ៏អស្ចារ្យហើយលើសពីនេះ គាត់នៅក្មេង ”Perez និយាយក្នុង Cadena COPE។
“គាត់នៅមានពេលវេលាជាច្រើនឆ្នាំ ដើម្បីពង្រឹងសមត្ថភាព ប៉ុន្តែយើងសរសើរដល់ Karim Benzema និងកីឡាករដៃទៀតក្នុងក្រុម។ ខ្ញុំមិនបាននិយាយជាមួយប្រធានក្រុម Tottenham ពីតម្លៃនេះទេ ពីព្រោះតែបើខ្ញុំសួរ គាត់នឹងនិយាយថាតម្លៃខ្លួន២៥០លានអឺរ៉ូ”។
Spurs នឹងទទួល Real Madrid នៅកីឡដ្ឋាន Wembley សប្ដាហ៍ក្រោយបន្ទាប់ពីការប្រកួតក្នុង Carabao Cup ជាមួយ West Ham និងជំនួបជាមួយ Manchester United ក្នុងPremier League៕
