បើតាមការបញ្ជាក់ពីសហព័ន្ធក្រុមបាល់ទាត់ជម្រើសជាតិអេស្ប៉ាញបានឲ្យដឹងថា ខ្សែការពារ Dani Carvajal នឹងចូលរួមជាមួយក្រុមជើងឯកពិភពលោកឆ្នាំ២០១០សម្រាប់យុទ្ធនាការ FIFA World Cup នៅប្រទេសរុស្ស៊ីបាន។
ក្រោយការពិនិត្យពីរបួសរួចរាល់ ក្រុមគ្រូពេទ្យនៃមន្ទីរពេទ្យនាទីក្រុងម៉ាឌ្រីដបានបង្ហាញសញ្ញាវិជ្ជមានថាខ្សែការពារ Real Madrid រូបនេះមិនមានបញ្ហាអ្វីធ្ងន់ធ្ងរទេហើយជួយអេស្ប៉ាញនៅក្នុងពានរង្វាន់ពិភពលោកបាន។
គួររំលឹកថា Carvajal បានរងរបួសក្នុងការប្រកួតវគ្គផ្ដាច់ព្រ័ត្រពានរង្វាន់ UEFA Champions League កាលពីថ្ងៃអាទិត្យដែល Real Madrid បានយកឈ្នះ Liverpool ៣ទល់នឹង១ ខណៈរូបគេត្រូវបានប្តូរចេញតាំងពីនាទីទី៣១នៅក្នុងវគ្គទី១។
គួរបញ្ជាក់ថា សមាសភាព២៣រូបរបស់អេស្ប៉ាញនៅអាចផ្លាស់ប្ដូរបានរហូតដល់ថ្ងៃទី ៤មិថុនា ស្របពេលកីឡាករបម្រុងដែលអាចជំនួស Carvajal នោះគឺ Hector Bellerin របស់ក្រុមកាំភ្លើងធំ Arsenal៕
