ងាកចេញពីពីបាល់ទាត់បុរសបន្តិច! ក្រុមបាល់ទាត់ជម្រើសជាតិនារីសហរដ្ឋអាមេរិក នឹងធ្វើជាម្ចាស់ផ្ទះពានរង្វាន់ SheBelieves Cup women’s Football នៅខែមិនាឆ្នាំ២០១៨ខាងមុខ។
ម្ចាស់ការពារដំណែងជើងឯកបារាំង ក្រុមកំពូលតារាង Women FIFA Ranking សហរដ្ឋអាមេរិក ក្រុមលេខ២ពិភពលោកអាល្លឺម៉ង់ និងក្រុមលេខ៣អង់គ្លេសនឹងត្រូវជួបគ្នាក្នុងពានរង្វាន់នេះ។ ក្រុមជម្រើសជាតិនារីលំដាប់កំពូលក្នុងពិភពលោកប៉ុន្មានក្រុមនេះ នឹងត្រូវលេងរយៈពេលមួយសប្ដាហ៍ ខណៈកាលពីឆ្នាំ២០១៦អាមេរិកឈ្នះពាន ហើយឆ្នាំ២០១៧នេះបារាំងដណ្ដើមបានវិញ។
ការប្រកួតនឹងធ្វើក្នុងរូបមន្តវិលជុំ ចាប់ផ្ដើមពីថ្ងៃ ទី ១ ខែ មិនា ក្នុង ទីក្រុង Columbus រដ្ឋ Ohio ខណៈដែលអង់គ្លេស ត្រូវជួបបារាំង ហើយម្ចាស់ជើងឯក World Cup Women អាមេរិកត្រូវជួប ម្ចាស់ជើងឯកមេដាយមាសអូឡាំពិកអាល្លឺម៉ង់។ បីថ្ងៃបន្ទាប់ ក្នុងកីឡដ្ឋាន Red Bull Stadium ក្នុងទីក្រុង Harrison រដ្ឋ New Jersey អាមេរិក នឹងត្រូវជួបបារាំងហើយអាល្លឺម៉ង់ត្រូវជួបអង់គ្លេស។
រហូតដល់ថ្ងៃទី ៧ មីនានៅ Orlando បារាំងជួបអាល្លឺម៉ង់ និងអាមេរិកជួបអង់គ្លេស៕
