ម្សិលមិញនេះមានសារព័ត៌មានក្នុងស្រុកមួយសរសេរព័ត៌មានបានចុះផ្សាយថាក្រុមជើងឯកលីគកំពូលរបស់ប្រទេសស្កុតឡែន ៤៨សម័យកាលគឺ Celtic FC នឹងធ្វើដំណើរមកប្រកួតមិត្តភាពអន្តរជាតិជាមួយក្រុមជម្រើសជាតិកម្ពុជា នៅថ្ងៃទី២៧ ខែមិថុនា នេះ។
ជុំវិញបញ្ហានេះលោក Leonardo Vitorino គ្រូបង្វឹកក្រុមជម្រើសជាតិកម្ពុជា ប្រកែកថាលោកមិនបានដឹងរឿងអ្វីទាល់តែសោះ ហើយលោកក៏បានរំសាយក្រុមជម្រើសជាតិតាំងពីក្រោយ១ថ្ងៃ ដែលក្រុមលោកបានយកឈ្នះក្រុមអាហ្វហ្គានីស្ថាន ១ទល់០ ក្នុងវគ្គជម្រុះជើងឯកប្រចាំទ្វីបអាស៊ី (AFC Asian Cup) មកម៉្លេះ។
ចំណែកប្រភពមកពីមន្រ្តីរបស់សហព័ន្ធកីឡាបាល់ទាត់កម្ពុជា មួយរូបបានឱ្យដឹងថាថ្នាក់ដឹកនាំរបស់សហព័ន្ធមិនបានដឹងរឿងថាក្លិប Celtic FC មកប្រកួតនៅកម្ពុជា នោះទេ ប្រសិនបើមានរឿងនេះមែនក៏គួរតែដឹងមុនយ៉ាងតិច៣ខែឬ៦ខែមុន។
បើងាកទៅមើលការផ្សាព្វផ្សាយរបស់អង្គការក្រៅរាជរដ្ឋាភិបាលមួយបានសរសេរនៅលើហ្វេសប៊ុកឈ្មោះFootball For Change ក្នុងអត្ថន័យថា៖ «ដែលជាអង្គការយុវជនមួយ។ ព្រឹត្តិការណ៍នេះបង្កើតឡើងដោយមានការគាំទ្រពីមូលនីធិ Indochina Starfish Foundation – ISF Cambodiaវាជាអង្គការដែល មានបេសកម្ម មុតមាំក្នុងការផ្តល់សេវាកម្មអប់រំ សេវាកម្មថែទាំសុខភាព និង លំហាត់ប្រាណដល់ក្មេងកំព្រា រឺ ក្រីក្រទាំងឡាយនៅកម្ពុជា។ Football For Change (កីឡាបាល់ទាត់ដើម្បីការផ្លាស់ប្តូរក្នុងជីវិត) រួមជាមួយ នឹង គ្រូបង្វឹកជំនាញ មកពី Celtic FC (ក្លិបបាល់ទាត់ Celtic) នឹង ធ្វើដំណើរទស្សនកិច្ចទៅអង្គការនោះ ព្រមទាំងផ្តល់វគ្គបណ្តុះបណ្តាល ២វគ្គ ដល់ក្មេងៗ និងយុវជនវ័យក្មេង។ ពួកយើងមានសេក្តីរំភើបរីករាយ ចំពោះព្រឹត្តិការណ៏នេះណាស់»។
យោងតាម twitter របស់ក្លិប Celtic FC វិញមិនបានបង្ហាញកម្មវិធីណាមួយមកប្រកួតនៅកម្ពុជា នោះទេ ដោយបង្ហាញពីកាលវិភាពប្រកួតមិត្តភាពជាមួយក្រុមBlau-Weiß Linz និង Rapid Wienរបស់ប្រទេសអូទ្រីស និងក្លិបSK Slavia Praha របស់ប្រទេសឆេក ប៉ុណ្ណោះ។
Here we go again!
🇦🇹 @BlauWeissLinz/@skrapid
🇨🇿 @slaviaofficial
🇮🇪 @ShamrockRoversLIVE to all @CelticTV subscribers! pic.twitter.com/h0i0dnovSF
— Celtic TV (@CelticTV) June 20, 2017
ដូច្នេះរឿងក្រុម Celtic FC មកប្រកួតនៅខ្មែរជារឿងមិនពិត ព្រោះថាតាមគម្រោងដែលថាមកប្រកួតនៅថ្ងៃទី២៧ មិថុនា តែនៅថ្ងៃទី២៨ ខែមិថុនា ក្រុមនេះត្រូវប្រកួតជាមួយក្លិប Blau-Weiß Linz របស់ប្រទេសអូទ្រីស នោះទេ។ ខុសគ្នាមួយថ្ងៃ ហើយត្រូវធ្វើដំណើរឆ្លងទ្វីបទៀត តើរឿងនេះអាចទៅរួចដែរឬទេ?
