ខ្សែការពារស្លាបស្ដាំក្រុមភ្នំពេញក្រោនអ៊ុក សុវណ្ណបានចូលលេង២ប្រកួតក្នុង Metfone Cambodian League រដូវកាល២០១៨ដោយបានលេងពេញម៉ោងហើយជួយក្រុមភ្នំពេញក្រោនទទួលបានលទ្ធផលឈ្នះទាំងពីរប្រកួត។
ទទួលបានការទុកចិត្តពីគ្រូបង្វឹកក្លឹបលោក Sean Sainsburyការចូលលេងជម្រើសដំបូង១១នាក់ ហើយពេញ៩០នាទីនេះបានធ្វើឲ្យរូបគេមានឱកាសជាប់ឈ្មោះក្នុងជម្រើសជាតិកម្ពុជាឈុតធំជាលើកដំបូង ក្នុងអាជីពត្រៀមប្រកួតមិត្តភាពជាមួយឡាវ និងធ្វើដំណើរទៅប្រកួតក្នុងពានរង្វាន់ AFC Asian Cup 2019 ជាមួយអាហ្វហ្គានីស្ថាន។
ទោះយ៉ាងនេះក្ដី! កីឡាករចេញពីថ្នាលយុវជនរបស់ភ្នំពេញក្រោនរូបនេះ មិនរំពឹងថាជាប់ជម្រើសដំបូង១១នាក់ក្រោមការជ្រើសរើសរបស់លោក ប្រាក់ សុវណ្ណារ៉ានោះទេ តែរូបគេមានមោទនភាព និងរីករាយដែលអាជីពបាល់ទាត់របស់ខ្លួនបានកែប្រែទៅមុខហើយ។
ក្រោយធ្វើការហ្វឹកហាត់ចប់ជាមួយមិត្តរួមក្រុមត្រៀមធ្វើដំណើរទៅជួបក្រុមវិសាខាក្នុងការប្រកួតសប្ដាហ៍ទី៣ ពាន Cambodian League អ៊ុក សុវណ្ណបាននិយាយថា៖” រីករាយណាស់បង!ពិតជារីករាយ ដែលខ្ញុំមានឈ្មោះក្នុងជម្រើសជាតិឈុតធំ។ កាលពីមុនខ្ញុំបានត្រឹមលេងក្នុងឈុតយុវជន U15, U15, U17, និង U19 ប៉ុន្តែពេលនេះអាជីពបាល់ទាត់របស់ខ្ញុំបានកែប្រែទៅមុខហើយ”។
“ មិនសង្ឃឹមច្រើនទេបង ពីព្រោះរាមច្បងសុទ្ធតែជាកីឡាករមានបទពិសោធហើយលេងល្អ។ ទោះពេលនេះខ្ញុំមិនជាប់ជម្រើសដំបូង តែការមានឈ្មោះក្នុងជម្រើសជាតិលើកនេះពិតជាមានមោទនភាព”។
“មិនយូរតែបង! ខ្ញុំនឹងអាចប្រជែងដំណែងនេះបាន ការប្រឹងហ្វឹកហាត់ ការគោរពវិន័យ ថែរក្សាសុខភាព និងរបបអាហារ មិនយូរទេខ្ញុំនឹងបានលេង”។
សូមបញ្ជាក់ផងដែរថា អ៊ុក សុវណ្ណគឺជាកីឡាករម្នាក់ក្នុងចំណោម៥នាក់របស់ភ្នំពេញក្រោនដែលគ្រូបង្វឹកជម្រើសជាតិលោកប្រាក់ សុវណ្ណារ៉ាកោះហៅឲ្យចូលលេងជម្រើសជាតិមានដូចជា៖ខ្សែការពារស្លាបឆ្វេង សឿត បារាំង ខ្សែការពារកណ្ដាល យ៉ើ សាហ្វី ខ្សែបម្រើកណ្ដាល អន ចាន់ប៉ូលីន និងខ្សែប្រយុទ្ធស្លាប ស៊ិន កក្កដា៕
រូបភាព៖ ភ្នំពេញក្រោន