មុនពេលចេញដំណើរទៅចូលរួមការប្រកួតកីឡាស៊ីហ្គេម លើកទី២៩ ប្រទេសម៉ាឡេស៊ី អត្តពលិកការ៉ាត់តេដូកម្ពុជា ចំនួន ៧រូប រួមមានកីឡាករ ៤រូប និងកីឡាការិនី ៣រូប បានជួបសំណេះសំណាល ជាមួយ លោកបណ្ឌិតសភាចារ្យ អូន ព័ន្ធមុនីរ័ត្ន ប្រធានខេមរសហព័ន្ធកីឡាការ៉ាតេដូកម្ពុជា ទទួលការណែនាំ និងអនុសាស៍ល្អៗ ក៏ដូចការលើកទឹកចិត្ត កាលពីថ្ងៃទី១៨ ខែសីហា ម្សិលមិញ នៅទីស្តីការក្រសួងក្រសួងសេដ្ឋកិច្ច និងហិរញ្ញវត្ថុ។
ជាមួយនឹងការចេញទៅប្រកួតរបស់ប្រតិភូការ៉ាត់តេដូកម្ពុជានេះដែរ លោក បណ្ឌិតសភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធាន ខេមរសហព័ន្ធកីឡាការ៉ាតេដូកម្ពុជានៅទីស្តីការក្រសួង មានប្រសាសន៍ថា លោកមានគម្រោងរួចរាល់ហើយ ដើម្បីអភិវឌ្ឍវិស័យការ៉េតេដូនៅកម្ពុជា ឆ្ពោះទៅរកការប្រកួតប្រជែងនៅលើឆាកអន្តរជាតិ ពិសេត្រៀមនៅឆ្នាំ២០២៣ ស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះក្នុងនោះ ។
លោកបន្ថែមថាក្នុងនាមលោកជាប្រធានសហព័ន្ធលោកបានស្នើដល់ប្រទេសជប៉ុនដែលជាម្ចាស់ដើមកីឡាការ៉ាតេដូនេះ ឲ្យជួយពង្រឹងផ្នែកបច្ចេកទេស សមត្ថភាពអត្តពលិក ឲ្យមានការរីកចម្រើន ដើម្បីឲ្យវិស័យកីឡាការ៉ាត់តេដូកម្ពុជា ឆ្ពោះទៅសទ្ធិផលមួយ អាចប្រកួតប្រជែងទាំងថ្នាក់តំបន់ និងពិភពលោក ខណៈដែលជប៉ុនបានមកជួយខ្លះៗ ហើយនាពេលបច្ចុប្បន្ននេះ។
លោកទេសរដ្ឋមន្រ្តីឲក៏បានជំរុញឲ្យអត្តពលិកទាំងអស់ត្រូវមាន សាមគ្គីភាពគ្នាជាធ្លុងមួយ នៅក្នុងសហព័ន្ធកីឡាការ៉ាតេដូកម្ពុជា ជាពិសេសកីឡាករ-កីឡាការិនីត្រូវខិតខំប្រឹងប្រែងហ្វឹក ហាត់ដើម្បីឧត្តមភាពជាតិ ហើយសម្រាប់ការប្រកួតស៊ីហ្គេមលើកនេះកុំគិតថាគេខ្លាំងជាង យើង ឲ្យសោះ សំខាន់គឺទម្ងន់ស្មើគ្នាត្រូវតែប្រកួតឲ្យអស់ពីសមត្ថភាព និងកុំមើលស្រាលដៃគូ ប្រកួតឲ្យសោះ បើទោះដឹងថាគេមានកម្រិតសមត្ថភាពអន់ជាងខ្លួននោះ ប្រយ័ត្នភ្លាត់ស្នៀតបែរ ជាទទួលបានលទ្ធលផមិនល្អទៅវិញ។
សូមបញ្ជាក់ថា ប្រតិភូកីឡាការ៉ាតេដូកម្ពុជាដែលត្រូវទៅចូលរួមក្នុងព្រឹត្តិការណ៍កីឡា ស៊ីហ្គែមលើកទី២៩ នៅប្រទេសម៉ាឡេស៊ីនេះ មានកីឡាករ កីឡាការិនី ៧រូប ប្រតិដឹកនាំ ចៅក្រម និងគ្រូបង្វឹកសរុបចំនួន ១៤រូប ទទួលបានការឧបត្ថម្ភពីលោកទេសរដ្ឋមន្ត្រី អូន ព័ន្ធមុនីរ័ត្ន នូវប្រាក់ហោប៉ៅក្នុងម្នាក់ៗចំនួន ៣០០ដុល្លារផងដែរ៕
