ព្រឹត្តិការណ៍កីឡាស៊ីហ្គេម (Sea Games) ឆ្នាំ២០១៧ នៅមិនទាន់បើកឆាកជាផ្លូវការនៅឡើយនោះទេ ប៉ុន្តែមានវិញ្ញាសារកីឡាមួយចំនួនបានចាប់ផ្ដើមប្រកួត និងរកអ្នកឈ្នះអ្នកចាញ់ឃើញហើយ។ គិតត្រឹមថ្ងៃព្រហស្បត្តិ៍ ទី១៧ ខែសីហា ឆ្នាំ២០១៧ នេះក្រុមអត្តពលិកទៅពីប្រទេសកម្ពុជា រកបានមេដាយសំរឹទ្ធចំនួន២គ្រឿងហើយ ស្របពេលម្ចាស់ផ្ទះរកបានមេដាយបានច្រើនជាងគេគឺរហូតដល់១០គ្រឿង។
សរុបមេដាយត្រឹមថ្ងៃព្រហស្បត្តិ៍នេះ
ចំពោះកម្ពុជា រកមេដាយបានមេដាយសំរឹទ្ធចំនួន២គ្រឿង លើប្រភេទកីឡាសីឈិនឡូន-Chinlone (សីមួយប្រភេទមានប្រភពមកពីប្រទេសមីយ៉ាន់ម៉ា) លើវិញ្ញាសា Chinlone Event 4 និងChinlone Event 1។ ចំពោះវិញ្ញាសាChinlone Event 4 មេដាយមាសបានទៅថៃ មេដាយប្រាក់បានទៅម៉ាឡេស៊ី ខណៈកម្ពុជា និងប្រ៊ុយណេ ឈ្នះមេដាយសំរឹទ្ធ។ កីឡាករកម្ពុជា ដែលរកបានមេដាយនេះមានកីឡាករ Cheat Khemrin, Chhorn Sokhom, Heng Rawut, Nang Sopheap, Riem Sokphirom, Sopheak Johnny, Troeng Ly, Ung Narith។
ចំណែកមេដាយសំរឹទ្ធលើវិញ្ញាសា Chinlone Event 1 វិញមេដាយមាស បានទៅម្ចាស់ប្រភពកីឡាគឺមីយ៉ាន់ម៉ា ហើយឡាវ ឈ្នះមេដាយប្រាក់ ខណៈកម្ពុជា និងម៉ាឡេស៊ី ឈ្នះមេដាយសំរឹទ្ធ។ កីឡាករទាំង៨រូបខាងលើជាអ្នកនាំមេដាយលើវិញ្ញាសានេះផងដែរ។
ព្រឹត្តិការណ៍កីឡាស៊ីហ្គេមឆ្នាំ២០១៧ នេះនឹងចាប់ផ្ដើមពីថ្ងៃទី១៩ ខែសីហា ហើយបិទទៅវិញនៅថ្ងៃទី៣០ខែសីហា ឆ្នាំ២០១៧ ខណៈវិញ្ញាសារកីឡាមួយចំនួនប្រកួតមុនថ្ងៃបើកឆាកមកដល់។ ស៊ីហ្គេមឆ្នាំនេះរំពឹងថាអត្តពលិកចំនួន៤៨៨៨នាក់នឹងចូលរួមប្រកួតប្រជែង ក្រោមពាក្យស្លោកថា « Rissing Together»។ គណៈកម្មការរៀបចំការប្រកួតបានដាក់កីឡាចំនួន៣៨ប្រភេទ មាន៤០៥ វិញ្ញាសា នឹងដាក់ឱ្យអត្តពលិកប្រមាណជា៤៨៨៨នាក់ មកពីប្រទេសជាសមាជិកទាំង១១ចូលរួមប្រកួតប្រជែង៕
