ខ្សែប្រយុទ្ធរបស់ Chelsea កីឡាករ Alvaro Morata បានទទូចថាគាត់នឹងស៊ីញេកុងត្រាយកខ្សែបម្រើ Real Madrid កីឡាករ Isco ប្រសិនបើគាត់ជាគ្រូបង្វឹកក្រុមតោខៀវ។
Morata បានចាកចេញពី Real Madrid ទៅលេងនៅ Chelsea ក្នុងរដូវកាលនេះ ហើយរកបាន៨គ្រាប់ក្នុងការបង្ហាញខ្លួន១៥ប្រកួតឲ្យក្លឹបអង់គ្លេស តាំងពីចាប់ផ្ដើមរដូវកាល២០១៧-១៨មក។ ឥឡូវខ្សែប្រយុទ្ធពូកែរកគ្រាប់បាល់ដោយប្រើក្បាលម្នាក់នេះ កំពុងបំពេញភារកិច្ចឲ្យជម្រើសជាតិ ហើយអំឡុងក្នុងសន្និសិទកាសែតក្នុងការប្រកួតរូបបាននិយាយថា នឹងនាំយកមិត្តរួមក្រុម Isco ទៅលេងនៅ Chelsea ដោយរូបគេបាននិយាយជានឹងយកកីឡាករម្នាក់ ដែលសំខាន់ជាងគេនៅ Real Madrid ។
“ខ្ញុំនឹងយក Isco ទៅ Chelsea ពេលត្រឡប់ទៅវិញ(ពេលបញ្ចប់ភារកិច្ចឲ្យជម្រើសជាតិ)ប៉ុន្តែ ខ្ញុំគិតថាគាត់គឺជាកីឡាករសំខាន់ម្នាក់នៅ Real Madrid, ហើយក្នុងក្រុមជម្រើសជាតិក៏គាត់ជាកូនសោរសំខាន់ដែរ” Morata និយាយក្នុងកាសែត Cadena Ser។
“ ខ្ញុំគិតថាយើងមិនអាចបញ្ឈប់គាត់ ពេលដែលគាត់មានអារម្មណ៍ថាខ្លួនឯងសំខាន់នៅក្លឹប។ ពិភពលោកទាំងមូលបានឃើញគាត់ធ្វើអ្វីនៅ Madrid ។ គាត់គឺជាកីឡាករសំខាន់បំផុតនៅ Real Madrid និងក្នុងជម្រើសជាតិ។ គាត់ផ្លាស់ប្ដូរការប្រកួត គាត់ជាអ្នកកែប្រែ គាត់រាំជាមួយបាល់យ៉ាងល្អ(សើច) ពិសេសគាត់ជាមិត្តល្អរបស់ខ្ញុំ”។
កាលពីយប់មិញនេះដែរ អេស្ប៉ាញបានប្រកួតឈ្នះកូស្ការីកា៥ទល់០ក្នុងលក្ខណៈមិត្តភាព ខណៈ Morata ក៏រកបាន១គ្រាប់ដែរក្នុងចំណោម៥គ្រាប់នេះ៕
