ក្រុមអ្នកគាំទ្រជាង ១០០,០០០ នាក់ បានប្រមូលផ្តុំគ្នានៅលើទីលានប្រណាំងរថយន្ដអន្តរជាតិ Sepang International Circuit ដើម្បីចូលរួមទស្សនាការប្រកួតប្រណាំងរថយន្ត Formula 1 ចុងក្រោយនៅលើទឹកដីរបស់ខ្លួន នៃប្រទេសម៉ាឡេស៊ី។

ជាការកត់សម្គាល់ ថ្ងៃចុងក្រោយនៃការប្រកួតប្រណាំរថយន្ដកម្រិតពិភពលោក បានចេញជាចំណងជើងមួយថា «ពាក្យថាលាហាក់ដូចជាពាក្យដែលពិបាកបំផុត» នៅលើវេបសាយ thestar។

សំនេរក្នុងអត្ថបទដដែលបានសរសេរថា មិនត្រឹមតែអ្នកគាំទ្រចំនួន ១១០,៦០៤ នាក់ប៉ុណ្ណោះទេ ដែលពិបាកនិយាយពាក្យថាលានេះ ខណៈអ្នកបើកបររថយន្ត F1 ក៏ដូចគ្នាដែរ។

ជើងឯក៣សម័យកាល Formula 1 និងជាសមាជិកក្រុម Mercedes-AMG Petronas កីឡាករ Lewis Hamilton មានការសោកស្តាយដែលវាក្លាយជាការប្រណាំងចុងក្រោយរបស់គាត់នៅ Sepang ដោយគេបន្ថែមថា ខ្លួនមានការចងចាំល្អៗជាច្រើននៅទីនេះ។

Lewis  បាននិយាយថាចំនួនមនុស្សដ៏ច្រើនកុះករចាប់តាំងពីថ្ងៃព្រហស្បតិ៍គឺ «អស្ចារ្យ»។ សម្ដីរបស់ Lewis Hamilton ដែលត្រូវបានស្រង់ដោយ thestar។

Lewis Hamilton បានបន្ថែមថា «នេះគឺជាចំនួនអ្នកគាំទ្រច្រើនបំផុតដែលខ្ញុំបានឃើញក្នុងរយៈពេល១០ឆ្នាំ របស់ខ្ញុំនៅថ្ងៃអាទិត្យនេះ»។

គួរបញ្ជាក់ថា  ម៉ាឡេស៊ី ទទួលធ្វើជាម្ចាស់ផ្ទះការប្រកួតនេះនឹងត្រូវបញ្ចប់ ដោយគណៈរដ្ឋមន្រ្តីរបស់ម៉ាឡេស៊ី បានមើលឃើញពីផលចំណេញត្រឡប់មកវិញគឺទាបជាងសម្រាប់ការទទួលធ្វើជាម្ចាស់ផ្ទះ បើប្រៀបធៀបទៅនឹងតម្លៃនៃការឈ្នះជើងឯក៕

រូបភាព: thestar