ក្លិបបាល់ទាត់ Fujieda MYFC សមាជិកក្នុងពានរង្វាន់លីគលំដាប់ទី៣របស់ប្រទេសជប៉ុន (J3 League) ដែលជាក្លិបកីឡាករ ចាន់ វឌ្ឍនាកា របស់កម្ពុជា កំពុងប្រកបអាជីព ជាមួយនោះ នឹងបន្តការប្រកួតរបស់ខ្លួនឡើងវិញ ក្រោយសម្រាកបន្ទាប់ពីចប់ជើងទី១ រយៈពេលជិត១ខែពោលគឺដំណើរការសប្ដាហ៍ទី១៨របស់ខ្លួន ថ្ងៃសៅរ៍ ទី១៩ខែសីហា ឆ្នាំ២០១៧ នៅចុងសប្ដាហ៍នេះ។
ក្រុម Fujieda MYFC នឹងត្រូវប្រកួតជាមួយក្រុមម្ចាស់ផ្ទះGiravanz Kitakyushu នៅវេលាម៉ោង៤ល្ងាច (ម៉ោងនៅកម្ពុជា) លើទីលានកីឡដ្ឋានKitakyushu Stadium ក្នុងទីក្រុងKitakyushu។ គិតត្រឹមពេលនេះក្រុម Fujieda MYFC កំពុងតែឈរចំណាត់ថ្នាក់លេ៩ប្រចាំតារាងរួមដែលមាន១៧ ក្រុមក្រោយរកបាន២៥ពិន្ទុក្នុងដៃ ក្រោយប្រកួតបាន១៧លើក ឈ្នះបាន៧លើក ស្មើ៤លើក និងចាញ់៦លើក។ ចំណែកក្រុម Giravanz Kitakyushu វិញកំពុងឈរចំណាត់ថ្នាក់លេខ៧ ក្រោយប្រកួតបាន១៧លើកឈ្នះ៨លើក ស្មើ៣លើកនិងចាញ់៦លើកមាន២៧ពិន្ទុក្នុងដៃ។
លោកគ្រូបង្វឹក Atsuto Oishi របស់ក្រុម Fujieda MYFC នៅមិនទាន់សម្រេចចិត្តដាក់ ចាន់ វឌ្ឍនាកា ឱ្យចូលលេងនៅឡើយនោះទេ ក្នុងចំណោម១៧សប្ដាហ៍មកនេះ។ លោកធ្លាប់លើកឡើងថាលោកចង់ឱ្យកីឡាកររូបនេះសាំនឹងក្រុមទាំងកម្លាំង បច្ចេទេស ជាមុនសិន ទើបដាក់ឱ្យចូលលេង បង្ហាញទម្រង់លេងបានល្អតែម្ដង។ កាលពីសប្ដាហ៍ទី១៥ កន្លងទៅលោកដាក់ក្នុងបញ្ជីបម្រុង បានម្តងតែមិនដាក់ឱ្យចូលលេងដូចគ្នា។
*ខាងក្រោមជាវីដេអូហាយឡាយក្នុងជំនួបគ្នាចុងក្រោយរបស់ក្រុមទាំង២៖
ពានរង្វាន់ប្រចាំលីគលំដាប់ទី៣ របស់ជប៉ុន មានក្រុមចូលរួមចំនួន១៧ក្រុម ហើយក្រុមដែលបញ្ចប់រដូវកាលរបស់ខ្លួនមានចំណាត់ថ្នាក់ខ្ពស់ជាងគេចំនួន២ក្រុមត្រូវឡើងទៅលេងពានរង្វាន់លំដាប់ទី២ នៅឆ្នាំបន្ទាប់។ ខ្សែប្រយុទ្ធ ចាន់ វឌ្ឍនាកា គឺជាកីឡាករដំបូងរបស់កម្ពុជា ដែលមានឈ្មោះផ្ទេរទៅលេងនៅប្រទេសជប៉ុន ផងដែរ។
