តារាបាល់ទាត់ជួរមុខរបស់ Liverpool កីឡាករ Mohamed Salah គឺជាកីឡាករល្អបំផុតក្នុងពិភពលោកឥឡូវនេះ។ នេះគឺជាសម្ដីរបស់វីរបុរសក្រុមហង្សក្រហម Steven Gerrard។
Salah មានបង្ហាញថ្វីជើងកាន់តែល្អទៅៗក្នុងការប្រកួតកាលពីយប់មិញដោយជួយLiverpool ឈ្នះRoma ៥ទល់២ក្នុងការប្រកួតពានរង្វាន់Champions League វគ្គ៤ក្រុមចុងក្រោយកាលពីយប់មិញ។ ខ្សែប្រយុទ្ធជម្រើសជាតិអេហ្ស៊ីបរកបាន២គ្រាប់ក្នុងវគ្គទី១មុនពេលបញ្ជូនបាល់ឲ្យSadio Mane និងRoberto Firmino បានមួយគ្រាប់ម្នាក់នៅវគ្គទី២មុនត្រូវប្ដូរចេញ។
ក្នុងស្ថានភាពនេះអតីតខ្សែបម្រើLiverpool លោក Gerrard បានជឿថាSalah ដែលរកបាន៤៣គ្រាប់ក្នុងរដូវកាលនេះ កំពុងតែល្អជាង Lionel Messi និងCristiano Ronaldo។
“គាត់ស្ថិតក្នុងទម្រង់លេងល្អបំផុតនៃអាជីពបាល់ទាត់របស់គាត់ហើយ។ វាពិតពិបាកនឹងប្រៀបធៀបគាត់ទៅនឹង RonaldoនិងMessi របស់អ្នកពីព្រោះពួកគេបានធ្វើរឿងល្អៗនេះយូរមកហើយ ហើយពួកគេក៏កំពុងតែប្រជែងពានម្ដងម្នាក់ៗផងដែរ។ ប៉ុន្តែខ្ញុំមិនខ្លាចនឹងនិយាយថានរណាជាកីឡាករល្អជាងគេបំផុតក្នុងពិភពលោកក្នុងពេលនេះ។ នោះអ្នកដឹងថាខ្ញុំនិយាយពីនរណាហើយ”។
ទោះបីជារបូតគ្រាប់បាល់ដល់ទៅ២គ្រាប់ចុងម៉ោងធ្វើឲ្យ Roma មានសង្ឃឹមយកឈ្នះវិញ Liverpool សង្ឃឹមថាអាចរក្សាកៅអីឡើងទៅវគ្គផ្ដាច់ព្រ័ត្រ៕
