អតីតអត្តពលិករត់ប្រណាំងដែលជាម្ចាស់មេដាយមាសអូឡាំពិក៩គ្រឿង Usain Bolt ត្រៀមនឹងធ្វើដំណើរមកកាន់ទឹកដីOld Trafford របស់ក្រុមបិសាចក្រហម Manchester United នៅពាក់កណ្ដាលឆ្នាំនេះ ដើម្បីធ្វើការប្រកួតបាល់ទាត់សប្បុរសធម៌មួយ។
អ្នករត់លឿនជាងគេនៅលើលោកម្នាក់នេះជាអ្នកគាំទ្រក្រុមបិសាចក្រហមដ៏ងប់ងុលម្នាក់ ហើយគាត់ត្រៀមនឹងធ្វើជាកាពីទែននៃក្រុមដែលមកពីជុំវិញពិភពលោក(Rest of the world XI) ប្រកួតទល់និងក្រុមរបស់លោកRobbie Williams ដែលមកពីអង់គ្លេស នាថ្ងៃទី១០ ខែមិថុនានេះ។
ក្រុមរបស់ Usain Bolt មានអតីតកីឡាករល្បីៗជាច្រើនចូលរួមដូចជា វីរៈបុរសអាហ្សង់ទីន Diego Maradona, គ្រូបង្វឹក Real Madrid បច្ចុប្បន្ន Zinedine Zidane, អតីតកំពូលអ្នកចាំទី Peter Schmeichel ជាដើម។Bolt បានប្រាប់ទៅវេបសាយផ្លូវការរបស់ Manchester United ថា៖
“ខ្ញុំតែងតែមានក្ដីសុបិន ចង់ក្លាយជាកីឡាករបាល់ទាត់អាជីពម្នាក់ ដូច្នេះការដែលបានឈានជើងចូលក្នុងទីលាននៅ Old Trafford និងលេងជាមួយវីរបុរសបាល់ទាត់ជាច្រើននាក់ វានឹងក្លាយជារឿងមួយដ៏អស្ចារ្យបំផុតសម្រាប់ខ្ញុំ”៕
Goal.com
