ប្រភពកាសែតអេស្ប៉ាញ El Chiringuito, Real Madrid បានទាក់ទងជាមួយនឹង Mohamed Salah ដើម្បីពិភាក្សាធ្វើយ៉ាងអាចនាំយកខ្សែប្រយុទ្ធអេហ្ស៊ីបរូបនេះ ទៅលេងនៅអេស្ប៉ាញក្នុងរដូវដោះដូរកីឡាកររដូវកាលក្រោយ។
ចាប់តាំងពីបាត់បង់ Philippe Coutinho ទៅកាន់ Barcelona មក Jurgen Klopp កំពុងមានទំនុកចិត្តជាមួយនឹងទម្រង់កីឡាករវ័យ២៥ឆ្នាំ ដែលបង្ហាញទម្រង់លេងរកបាន២៤គ្រាប់ក្នុងចំណោម៣០ប្រកួតឲ្យហង្សក្រហម។ គ្រាប់បាល់សរុប១៧គ្រាប់ក្នុង២១ប្រកួតនៃពាន Premier League បានធ្វើឲ្យរូបគេក្លាយជាកីឡាករដែលមានកំណត់ត្រារកគ្រាប់បាល់គិតជានាទីល្អជាងគេក្នុងលីកកំពូលអង់គ្លេស។
¡EXCLUSIVA de @EduAguirre7! “El REAL MADRID ha RECIBIDO la VISITA de la AGENTE de SALAH para una PRIMERA TOMA de CONTACTO”. #ChiringuitoMadrid pic.twitter.com/QJrYkNmfk0
— El Chiringuito TV (@elchiringuitotv) January 19, 2018
បើនិយាយពីទម្រង់លេងក្នុងពេលបច្ចុប្បន្ន រូបគេត្រូវបានគេចាត់ទុកថាជាកីឡាករលេងល្អជាង Ronaldo និង Messi ក្នុងរដូវកាលនេះ។ Real Madrid សង្ឃឹមថានឹងអាចអន្ទងយក Salah ចេញពី Liverpool ខណៈដែលក្រុមរបស់ Zidane ត្រូវការពង្រឹងអ្នករកគ្រាប់បាល់ដែលកំពុងតែធ្លាក់ចុះខ្លាំង ហើយតាមពីក្រោយក្រុមកំពូលតារាង Barcelona ១៩ពិន្ទុ។
Salah មកលេងនៅ Liverpool ក្នុងតម្លៃ៤០លានផោន ហើយរូបគេនឹងក្លាយជាកីឡាករដែលទាក់ទាញចំណាប់អារម្មណ៍បំផុតក្នុងថ្ងៃដោះដូរកីឡាករឆ្នាំ២០១៨ ខណៈអ្នកតំណាងរបស់កីឡាករអេហ្ស៊ីបរូបនេះ បានធ្វើដំណើរទៅដល់ទីក្រុងម៉ាឌ្រីដកាលពីប៉ុន្មានថ្ងៃមុន៕
