តារាបាល់ទាត់ Barcelona កីឡាករ Lionel Messi បានក្លាយជាកីឡាករសំខាន់បំផុតដែលជួយឲ្យក្លឹបយក្សនៅ La liga មួយនេះជោគជ័យ។ នេះបើតាមសម្ដីរបស់ខ្សែការពារជម្រើសជាតិអេស្ប៉ាញ Gerard Pigue។
Pigue ដែលទើបតែបន្តកុងត្រាជាមួយ Barca ដល់ឆ្នាំ២០២២បាននិយាយថាសរសើរដល់ប្រធានក្រុមជម្រើសជាតិអាហ្សង់ទីន ។ Messi ឈ្នះពានទាំងតូច ទាំងធំ ទាំងល្មម ទាំងល្បី និងមិនល្បីចំនួន២៩គ្រឿង ក្នុងការលេងឲ្យក្លឹបមានមូលដ្ឋាននៅតំបន់កាតាឡាន់ ១៤រដូវកាល ហើយរដូវកាលនេះអាចនឹងបន្ថែម La ligaមួយទៀត ហើយ Pigue ដែលមានវ័យ៣០ឆ្នាំ ពិតជាមានមោទនភាពចំពោះភាពជោគជ័យរបស់ក្រុម និង Messi។
“ កូនសោសំខាន់របស់Barcelona ក្នុងជំនាន់នេះគឺLeo។យើងគ្រាន់តែតាមពីក្រោយគាត់ប៉ុណ្ណោះ។ យើងព្យាយាមជួយគាត់ពីព្រោះគាត់ត្រូវការក្រុមមានការប្រកួតប្រជែងដើម្បីឈ្នះពាន” Pigue និយាយក្នុងសន្និសីទកាសែតមួយកាលពីម្សិលមិញ។
ក្រោយឈរកំពូលតារាងក្របខណ្ឌ La liga, Barcelona នឹងត្រូវទទួលស្វាគមន៍ក្រុមភ្ញៀវប្រជៀវខ្មៅ Valencia ក្នុងពាន Copa del Rey វគ្គពាក់កណ្ដាលផ្ដាច់ព្រ័ត្រនៅថ្ងៃព្រហស្បតិ៍៕
