ខ្សែប្រយុទ្ធជម្រើសជាតិវេល Gareth Bale បានបង្ហើបថា ខ្លួនចង់ត្រឡប់ទៅលេងនៅ Premier League វិញ ពោលគឺចង់ទៅលេង Manchester United ដោយបដិសេធ Bayern Munich ប្រសិនបើ Real Madrid ចង់លក់រូបគេចេញពិតមែន។
ក្ដីសង្ឃឹមរបស់ Jose Mourinho អ្នកចាត់ការបិសាចក្រហម ក្នុងការចរចាយក Bale លើតម្លៃ ១០០លានផោននោះ គឺពឹងផ្អែកលើការសម្រេចរបស់អ្នកចាត់ការថ្មី Real តែប៉ុណ្ណោះ។ ក្លឹប Real កំពុងស្វែងរកអ្នកចាត់ការមកស្នងដំណែងរបស់ Zinedine Zidane ហើយក៏ជាអ្នកកំណត់អនាគតរបស់ Bale ក្នុងការបន្តនៅទឹកដី Bernabeu ឬយ៉ាងណា។
ថ្មីៗនេះ Bale បានបង្ហើបពីភាពមិនសប្បាយចិត្តនឹងស្ថានភាពជាកីឡាករបម្រុងនៅ Real Madrid បន្ទាប់ពីប្ដូរចូលក្នុងវគ្គផ្ដាច់ព្រ័ត្រ Champions League រួចស៊ុត២គ្រាប់ឱ្យ Real ផ្ដួល Liverpool ៣-១ កាលពីថ្ងៃទី២៦ខែឧសភាឆ្នាំ២០១៨។
គួរដឹងដែរថាមកទល់ថ្ងៃទី៦ខែមិថុនាឆ្នាំ២០១៨ Man Utd ទិញបានកីឡាករ២នាក់ហើយគឺខ្សែបម្រើប្រេស៊ីល Fred ពីក្លិប Shakhtar Donetsk តម្លៃ៤៧លានផោន និងខ្សែការពារស្លាបវ័យ១៩ឆ្នាំ Diogo Dalot ពី Porto តម្លៃ១៩លានផោន៕
