តារាសំខាន់របស់ Chelsea កីឡាករ Eden Hazard បានបញ្ជាក់ថាគាត់នឹងបន្តកុងត្រាថ្មីជាមួយតោខៀវរយៈពេលយូរ ដើម្បីបន្តអនាគតជាមួយក្លឹបមួយនេះ។
កីឡាករជម្រើសជាតិបែលហ្សិក ដែលមកលេងជាមួយ Chelsea តាំងពីឆ្នាំ២០១២ តែងតែមានទំនាក់ទំនងម្ដងហើយម្ដងទៀតជាមួយនឹងការផ្ទេរទៅលេងនៅ Real Madrid បើគិតៗទៅមានរយៈពេល២ឆ្នាំមកហើយ។ ទោះបីជាត្រឹមតែជាពាក្យចចាមអារ៉ាម ប៉ុន្តែ Hazard ខ្លួនឯងក៏ធ្លាប់និយាយសរសើរគ្រូបង្វឹក Real Madrid លោក Zidane ហើយពេលនេះរូបគេបានបញ្ជាក់ដោយខ្លួនឯងផ្ទាល់ថា នឹងកាន់ប៊ិកស៊ីញេកុងត្រាបន្ថែមជាមួយតោខៀវហើយ។
លើសពីហ្នឹងទៅទៀត! Hazard ក៏បាននិយាយថាគាត់នឹងស៊ីញេកុងត្រាបន្ទាប់ពីអ្នកចាំទី Thibaut Courtois ស៊ីញេរួចហើយខណៈដែលអ្នកចាំទីជម្រើសជាតិបែលហ្សិករូបនេះ ក៏មានទំនាក់ទំនងទៅលេងនៅ Real ដូចគ្នា។ ពេលអ្នកកាសែតសួរថាតើអ្នកនឹងបន្តកុងត្រាថ្មីជាមួយ Chelsea? ហើយ Hazardនិយាយក្នុង Daily Mirror ថា៖” បាទ! ខ្ញុំគិតថាThibaut មុនគេ ហើយក្រោយមកទើបមកដល់ខ្ញុំ”។
សម្ដីប៉ុន្មានម៉ាត់នេះបានធ្វើឲ្យប្រិយមិត្ត Chelsea ជឿជាក់ ខណៈដែលមួយរយៈចុងក្រោយនេះ ពួកគេព្រួយបារម្ភខ្លាចSuper Star របស់ខ្លួនស៊ីញេកុងត្រាឲ្យក្លឹបយក្ស La liga ៕
