ខ្សែប្រយុទ្ធ Liverpool កីឡាករ Roberto Firmino បាននិយាយថា ចង់ឲ្យហង្សក្រហម ចាប់គូប៉ះចំក្រុមមកពីអង់គ្លេសក្នុងChampions League វគ្គ៨ក្រុមចុងក្រោយ។
ក្រុមហង្សក្រហម បានឡើងទៅវគ្គ៨ក្រុមចុងក្រោយជាលើកដំបូង បើគិតចាប់តាំងពីរឆ្នាំ២០០៩មក ហើយបន្ទាប់ពីឈ្នះក្រុមព័រទុយហ្គាល់ Porto ទាំងពីរជើងក្នុងលទ្ធផល៥ទល់០។ ក្នុងវគ្គ៨ក្រុមចុងក្រោយក្រុមលោក Jurgen Klopp ងាយនឹងជួបក្រុមអង់គ្លេសដូចគ្នា ខណៈដែលគូប្រជែងពានក្នុងក្របខណ្ឌ Premier League មេឃខៀវ Manchester City ក៏បានឡើងទៅរួចហើយដែរក្រោយឈ្នះ Basel ខណៈពេលដែល Manchester United និងChelsea លេងនៅអាទិត្យក្រោយ។
ជារឿយៗ ក្លឹបនៅក្នុងលីកជាមួយគ្នាមិនចង់ជួបគ្នានោះទេ ប៉ុន្តែ Firmino ចង់ជួបក្រុមនៅលីកជាមួយគ្នាដោយសារតែសមត្ថភាពធ្លាប់បានថ្លឹងថ្លែងរួចហើយ ក្រោយជួបគ្នានៅការប្រកួតកន្លងមក។
“ពិតណាស់!យើងចង់ឲ្យក្រុមចាប់គូប៉ះក្រុមមកអង់គ្លេសណាមួយ។ យើងបានបង្ហាញសមត្ថភាពរបស់យើងនៅ២រដូវកាលចុងក្រោយនេះថាយើងអាចយកឈ្នះក្លឹបធំៗនៅអង់គ្លេស។ កំណត់ត្រារបស់យើងពិតជាល្អពេលលេងជាមួយពួកគេ”។
“យើងមានអារម្មណ៍ថាយើងបានលេងក្នុងការប្រកួតដ៏ល្អទល់នឹងកំពូលៗមកពីអង់គ្លេសហើយបានបង្ហាញថាយើងអាចយកឈ្នះពួកគេ។ប៉ុន្តែយើងនឹងមិនខ្លាចក្រុមណាទាំងអស់ទោះចាប់ឆ្នោតប៉ះក្រុមមកអង់គ្លេសឬក្រុមមកពីប្រទេសផ្សេង”។
ទោះបីជា Firmino ចង់ជួបក្រុមអង់គ្លេសប៉ុន្តែ Emre Can បាននិយាយកាលពីថ្ងៃអង្គារថា រូបគេចង់ជួបក្រុមមកប្រទេសផ្សេងទៀត ប៉ុន្តែគេមិនដឹងនឹងត្រូវជួបក្រុមណានោះទេ”៕
