ក្រូមញញួរយក្ស West Ham United បានប្រកាសតែងតាំងលោក Manuel Pellegrini អតីតអ្នកចាត់ការ Manchester City ជំនួសលោកកៅអី លោក David Moyes ដែលទើបនឹងចែកផ្លូវគ្នាកាលពីពេលថ្មីៗនេះ។
បុរសវ័យ៦៤ឆ្នាំបានចុះហត្ថលេខា៣ឆ្នាំជាមួយ West Ham បន្ទាប់ពីឈប់ដឹកនាំក្លឹបចិន Hebei China Fortune កាលពីពេលថ្មីៗ។ Pellegrini ឈ្នះពាន Premier League និង League Cup ជាមួយ Man City និងនាំក្រុមឡើងដល់វគ្គពាក់កណ្ដាលផ្ដាច់ព្រ័ត្រ Champions League កាលពី២ឆ្នាំមុន។
លោក Pellegrini បានឲ្យវិបសាយរបស់ក្លឹបថា៖ “ខ្ញុំពិតជារីករាយណាស់ដែលបានវិលមកកាន់លីគបាល់ទាត់ល្អបំផុតលើលោកសារជាថ្មីម្តងទៀត ជាពិសេសមកដឹកនាំនៅ West Ham តែម្តង ព្រោះខ្ញុំបាននិយាយជាមួយប្រធានក្លឹបរួចរាល់ហើយ។”
“ខ្ញុំគិតថា West Ham បញ្ចប់រដូវកាលយ៉ាងលំបាក ប៉ុន្តែខ្ញុំគិតថាយើងនឹងធ្វើបានល្អឡើងវិញនៅរឌូវកាលក្រោយ ដោយធ្វើឲ្យអ្នកគាំទ្ររីករាយឡើងវិញ។ ខ្ញុំតែងតែលេងយុទ្ធសាស្រ្តប្រយុទ្ធ ហើយខ្ញុំសង្ឃឹមថាពួកយើងនឹងឈានទៅដល់គោលដៅដែលយើងបានកំណត់” នេះបើតាមការបន្ថែមរបស់គ្រូបង្វឹកខាងលើ។
គួររំលឹកថា អ្នកចាត់ការសញ្ជាតិឈីលី ធ្លាប់ដឹកនាំក្លឹបធំមួយចំនួននៅអេស្ប៉ាញដូចជា Real Madrid និង Villarreal ហើយចំណាយពេល២ឆ្នាំនៅលីគកំពូលចិន Chinese Super League តែបានត្រឹមនាំក្រុម Hebei បញ្ចប់នៅចំណាត់ថ្នាក់លេខ៤ប៉ុណ្ណោះ៕
