សហព័ន្ធ​កីឡា​បាល់ទាត់​កីឡា​បាល់ទាត់​បាន​ជូនដំណឹង​ដល់​មហាជន​ថា​ក្រុម​ជម្រើស​ជាតិ​កម្ពុជា​ក្រោម​អាយុ​​១៧​ឆ្នាំ (U17) នឹង​ត្រូវ​បើកទ្វា​ពហុកីឡដ្ឋាន​ជាតិ ក្នុង​រាជធានី​ភ្នំពេញ ទទួល​ក្រុម​ជម្រើស​ជាតិ​វៀតណាម ក្រោម​អាយុ​១៧​ឆ្នាំ (U17) នៅ​ក្នុង​ខែ​មិថុនា នេះ​ក្នុង​ជំនួប​មិត្តភាព​អន្តរជាតិ មុន​ចេញ​ទៅ​ប្រកួត​ពានរង្វាន់​ផ្លូវការ។

ការ​ប្រកួតរវាង​ប្រទេស​ក្បែខាង​គ្នា​ទាំង​២​​នេះ​នឹង​ធ្វើ​ឡើង​នៅ​វេលា​ម៉ោង​៦:៣០នាទី​ល្ងាច​ថ្ងៃ​ពុធ ទី២១ ខែ​មិថុនា ឆ្នាំ​២០១៧ ខាង​មុខ ព្រម​ទាំង​មាន​ផ្សាយផ្ទាល់​តាម​ប៉ុស្តិ៍​ទូរទស្សន៍​បាយ័នព័ត៌មាន (BTV News) ផង​ដែរ ខណៈ​ប្រទេស​ទាំង​២​នឹង​យក​ការ​ប្រកួត​កម្រិត​យុវជន​នេះ​ដើម្បី​រំលឹក​ខួប​ទំនាក់ទំនង​ការ​ទូត​រវាង​ប្រទេស​ទាំង​២ផង​ដែរ។

ចំពោះ​ក្រុម U17 កម្ពុជា វិញ​ដឹកនាំ​ដោយលោក​Inoue Kazunori ដែល​ជា​គ្រូ​បង្វឹក​ក្នុង​សាលា​បាល់ទាត់​ជាតិ​បាទី។ បុរស​ជនជាតិ​ជប៉ុន រូប​នេះ​មាន​តួរនាទី​ដឹកនាំ​ក្រុម​ជម្រើស​ជាតិ​កម្ពុជា U18 និង U19 ត្រៀម​ចេញ​ទៅ​ប្រកួត​ក្នុង​តំបន់​អាស៊ាន និង​តំបន់​អាស៊ី ផង​ដែរ ព្រម​ទាំង​​ដឹកនាំ​ក្រុម​យុវជន​សាលា​បាល់ទាត់​ប្រកួត​ក្នុង​ពានរង្វាន់​លីគ​លំដាប់​ទី២ នាពេល​កន្លង​មក។

ចំពោះ​ក្រុម U17 របស់​វៀតណាម ជា​ក្រុម​មួយ​ដែល​ធ្លាប់​ជោគជ័យ​ច្រើន​នៅ​ក្នុង​តំបន់​អាស៊ាន​ ពោល​គឺ​ធ្លាប់ឈ្នះ​ជើង​ឯក AFF U-16 Youth Championship ចំនួន​២លើក​គឺ​នៅ​ឆ្នាំ​២០០៦ និង​២០១០ ហើយ​នៅ​ឆ្នាំ​២០០៧ ធ្លាប់​ឈ្នះ​បាន​លេខ៣ និង​ឆ្នាំ​២០១៦ កន្លង​ទៅ​ជា​ក្រុម​ជើង​ឯករង ក្រោយ​ចាញ់​ក្រុម​អូស្រ្តាលី នៅ​វគ្គ​ផ្ដាច់ព្រ័ត្រ។

សម្រាប់​ក្រុម​យុវជន​របស់​កម្ពុជា កំពុង​ត្រៀម​ខ្លួន​​ទៅ​ចូលរួម​ប្រកួត​​ក្នុង​ពានរង្វាន់​យុវជនប្រចាំ​តំបន់​អាស៊ាន (AFF U18 Championship 2017) ចាប់​ពី​ថ្ងៃ​ទី​ ៤ ដល់​១៧​ខែ​កញ្ញា ឆ្នាំ​២០១៧ នៅ​ប្រទេស​មីយ៉ាន់ម៉ា។ ពានរង្វាន់​នេះ​មាន​ក្រុម​ចំនួន​១២ចូលរួម បូក​ទាំង​ក្រុម​ញូហ្សេឡែន ដែល​អញ្ញើញ​ឱ្យ​ចូលរួម។ កម្ពុជា ស្ថិត​ក្នុង​​ពូល A ជាមួយ​ក្រុម​ថៃ ម៉ាឡេស៊ី ទីម័រខាងកើត ឡាវ និង​សិង្ហបុរី ខណៈ​ពូល A មាន​ក្រុម​មីយ៉ាន់ម៉ា វៀតណាម ញូហ្សឡែន ឥណ្ឌូណេស៊ី ហ្វីលីពីន និង​ប្រ៊ុយណេ។
ក្រុម​នេះ​នឹង​ចូលរួម​​ក្នុង​ពានរង្វាន់​ជើង​ឯក​ប្រចាំ​ទ្វីប​អាស៊ី ដោយ​ស្ថិត​នៅ​ក្នុង​ពូល G នៃ​ពានរង្វាន់ AFC U19 Championship 2019 ជាមួយ​ក្រុម​ចិន, មីយ៉ាន់ម៉ា និង​ហ្វីលីពីន ខណៈ​កម្ពុជា ក៏​ទទួល​សិទ្ធិ​ធ្វើ​ជា​ម្ចាស់​ផ្ទះ​ ចាប់​ពី​ថ្ងៃ​ទី៤ ដល់​ថ្ងៃ​ទី៨ ខែ​វិច្ឆិកា។ វគ្គ​ជម្រុះ​តាម​ពូល​​នេះ​មាន​ក្រុម​ចូល​​រួម​ចំនួន​៤៣ ដែល​ជា​សមាជិក​​​របស់​សហព័ន្ធ​កីឡា​បាល់ទាត់​ទ្វីប​អាស៊ី ដោយ​បែងចែក​ទៅ​ជា​១០​ពូល ហើយ​ក្រុម​ដែល​ឈរ​លេខ១​តាម​ពូល​នីមួយៗ​មាន​ឈ្មោះ​ឡើង​ទៅ​លេង​​ចែក​ពូល​ចុងក្រោយ អម​ជាមួយ​ក្រុម​ចំណាត់​ថ្នាក់​លេខ២​ដែល​ល្អ​ជាង​គេ​ចំនួន​៥​ផ្សេង​ទៀត​ផង​ដែរ។

ក្រៅ​ពី​ហ្វឹកហាត់​​និង​ប្រកួត​មិត្តភាព​អន្តរជាតិ​នៅ​ក្នុង​ប្រទេស​​យុវជន​កម្ពុជា ឈុត​នេះ​មាន​​គ្រោង​ចេញ​ទៅ​​ហ្វឹកហាត់​នៅ​ហុងកុង ចាប់​ពី​ថ្ងៃ​ទី​២៦ ខែ​កក្កដា ដល់​ថ្ងៃ​ទី២ ខែ​សីហា មុន​ចេញ​ទៅ​មីយ៉ាន់ម៉ា និង​បន្ត​ចេញ​ទៅ​ហ្វឹកហាត់​នៅ​ប្រទេស​វៀតណាម ចាប់​ពី​ថ្ងៃ​ទី​២ ដល់​៩ ខែ​តុលា មុន​ត្រឡប់​​មក​ភ្នំពេញវិញ៕