កីឡាករជនជាតិរ៉្វាន់ដា Atuheire Kipson របស់ណាហ្គាវើល កំពុងបន្តឈរកំពូលតារាងក្នុងបញ្ជីកីឡាករដែលទាត់បញ្ជូលទីបានច្រើនជាងគេ គិតត្រឹមសប្ដាហ៍ទី១៣ នៃពានរង្វាន់លីគកំពូលកម្ពុជា (Metfone Cambodian League 2017) ក្រោយរកបានគ្រាបបាល់១៥ គ្រាប់ ច្រើនជាងកីឡាករដទៃ។
គ្រាប់បាល់ទាំង១៥គ្រាប់របស់ Kipson បានទាត់បញ្ជូលទីក្រុមអគ្គីសនីកម្ពុជា ៤គ្រាប់អាស៊ីអឺរ៉ុប ២គ្រាប់ ព្រះខ័នរាជស្វាយរៀង ២គ្រាប់ ហើយទាត់ចូលទីអគ្គស្នងការដ្ឋាននគរបាលជាតិ ១គ្រាប់ ស៊ីម៉ាក់១គ្រាប់ ក្រសួងការពារជាតិ១គ្រាប់ វេស្ទើនភ្នំពេញ១គ្រាប់ បឹងកេត ១គ្រាប់និងគីរីវង់សុខសែនជ័យ២គ្រាប់។
ឆ្លងកាត់១៣សប្ដាហ៍មកនេះក្រុមទាំង១២ បានទាត់បញ្ជូលទីគ្នាទៅវិញទៅមកចំនួន២៩៣គ្រាប់ ហើយក្រៅពីកីឡាករ Kipson ដែលរកគ្រាប់បាល់បានច្រើនជាងគេ ក៏មានកីឡាករមួយចំនួនប្រដេញតាមពីក្រោយដែរដូចជាកីឡាករជនជាតិកូរ៉េខាងជើង Choe Myong Ho របស់ក្រសួងការពារជាតិ រកបាន១៣គ្រាប់ កីឡាករជនជាតិហ្គាណា Michael Osei Tutu របស់ស៊ីម៉ាក់ រកបាន១២គ្រាប់ កីឡាករជនជាតិនីហ្សេរីយ៉ា Bisan Goerge របស់អាស៊ីអឺរ៉ុប បច្ចុប្បន្នចូលរួមជាមួយព្រះខ័នរាជស្វាយរៀង រកបាន១០គ្រាប់ កីឡាករអាហ្វ្រិកខាងត្បូង Booysen Shane របស់ភ្នំពេញក្រោន កីឡាករជនជាតិប្រេស៊ីល Maycon Calijuri របស់បឹងកេត រកបានម្នាក់៩គ្រាប់ កីឡាករ កែវ សុខផេង របស់ភ្នំពេញក្រោន កីឡាករ Chigozie Nwaokorie របស់ព្រះខ័នរាជស្វាយរៀង និងកីឡាករជនជាតិនីហ្សេរីយ៉ា Dzama Bata របស់ខេមបូឌានថាយហ្គឺរ (ចូលរួមជាមួយអាស៊ីអឺរ៉ុប) រកបាន៨គ្រាប់ រៀងៗខ្លួន ហើយកីឡាករជនជាតិនីហ្សេរីយ៉ា Baldwin Ngwa របស់អគ្គស្នងការដ្ឋាននគរបាលជាតិរកបាន៧គ្រាប់ និងក្រៅពីនោះសុទ្ធតែជាអ្នករកគ្រាប់បាល់បានម្នាក់៦ គ្រាប់ចុះក្រោម។
តាមគម្រោងក្រោយបញ្ចប់រដូវកាលឆ្នាំ២០១៧ នេះទៅកីឡាករដែលរកគ្រាប់បាល់ច្រើនជាងគេបង្អស់ នោះគណៈកម្មការរៀបចំការប្រកួតនឹងប្រគល់ពានរង្វាន់ (ឬហៅថាស្បែកជើងមាស) ព្រមទាំងថវិការលើកទឹកចិត្តចំនួន១.៥០០,០០០៛ ខណៈកីឡាករ ចាន់ វឌ្ឍនាកា ជាម្ចាស់ពានរង្វាន់នេះកាលពីឆ្នាំមុន ក្រោយរកបាន២២គ្រាប់ម្នាក់ឯង៕