ក្លឹបបាល់ទាត់ភ្នំពេញក្រោន បានប្រកាសចុះកុងត្រាយកអ្នកចាំទីសញ្ជាតិខ្មែរ-បារាំងកីឡាករ Alexandre You ដើម្បីរួមកម្លាំងជាមួយមិត្តរួមក្រុមដទៃទៀតនារដូវកាលថ្មីឆ្នាំ២០១៨នេះ។
អ្នកចាំទីរូបនេះកើតនៅថ្ងៃទី៨ ខែមីនា ឆ្នាំ១៩៩៤ នៅភូមិត្រពាំងត្នោត ឃុំសូរ្យសែន ស្រុកព្រៃឈរ ខេត្តកំពង់ចាម ប៉ុន្តែបានធ្វើដំណើរទៅរស់នៅប្រទេសបារាំងតាំងតែពីអាយុ១ឆ្នាំមកម្ល៉េះ។ ជាងនេះទៅទៀតយុវជន Alexandre You ក៏ធ្លាប់ជាសមាជិកក្រុម U14 ជម្រើសជាតិបារាំង និងធ្លាប់បង្ហាញខ្លួនបានចំនួន ៤លើកផងដែរ។
Alexandre You ធ្លាប់បានចូលហ្វឹកហាត់បាល់ទាត់ជាមួយក្រុម Toulouse Football Club និងបានចូលរួមជាមួយក្លឹបនេះតាំងពីឆ្នាំ១៩៩៩ រហូតដល់ឆ្នាំ២០១០ ។
ក្នុងវ័យ ១៨ឆ្នាំ រូបគេបានផ្ទេរទៅលេងនៅក្លឹប US Colomiers FC ដែលជាក្លឹបលេងនៅលីគទី៤ របស់បារាំងពីឆ្នាំ២០១១ ដល់ឆ្នាំ២០១២ មុននឹងប្តូរទៅលេងនៅក្លឹប Toulouse Fontaines FC (សមាជិកលីគទី៤បារាំង) ក្នុងរយៈពេល១ឆ្នាំ (ឆ្នាំ២០១៣) ៕
