កាលពីព្រឹកមិញ ក្លឹបបាល់ទាត់ព្រះខ័នរាជស្វាយរៀងបានប្រកាសពីការចែកផ្លូវគ្នាជាមួយលោក សំ វ៉ាន់ដេត ដោយមូលហេតុគ្រូបង្វឹករូបនេះជាប់ភារកិច្ចសិក្សាបន្តយកសញ្ញាប័ត្រគ្រូបង្វឹកកម្រិត A License។
បែបនេះក្ដីក្លឹបក៏បានប្រកាសបេក្ខភាពគ្រូបង្វឹកជំនួសគឺលោក Conor Nestor ជាគ្រូបង្គោល។ គ្រូបង្វឹកសញ្ជាតិអៀរឡង់ កាន់សញ្ញាប័ត្រកម្រិត UEFA A License រូបនេះ នឹងទទួលភារកិច្ចដឹកនាំក្លឹបបាល់ទាត់ព្រះខ័នរាជស្វាយរៀង នៅរដូវកាល២០១៨នេះ។ លោកធ្លាប់ដឹកនាំ យុវជនថ្នាលនៅ អៀរឡង់ អង់គ្លេស និងអូស្ត្រាលី
លោក សំ វ៉ាន់ដេត បានមកចូលរួមដឹកនាំក្លឹបម្ចាស់ជើងឯក Hun Sen Cup 2017 មួយនេះ នៅឆ្នាំ២០១២ ដល់ឆ្នាំ២០១៧ ដោយជួយក្លឹបមានមូលដ្ឋាននៅទឹកដីខេត្តស្វាយរៀង ឈ្នះជើងឯកលីគកំពូលកម្ពុជាបាន១ដង និងជើងឯកពានរង្វាន់ Hun Sen Cup ៣ដងផងដែរ។
ក្រៅពីនេះ ក្លឹបក៏បានប្រកាសចុះកុងត្រាផ្លូវការជាមួយកីឡាករ Shane Booysen ពីភ្នំពេញក្រោននិង កីឡាករ ស៊ួន សុវណ្ណ ពីក្លឹបវេស្ទើនភ្នំពេញផងដែរ៕
រូបភាព៖ ព្រះខ័នរាជស្វាយរៀងនិង Masayori Ishikawa
