ខ្សែប្រយុទ្ធជម្រើសជាតិប្រេស៊ីល Hulk បានបង្ហាញចំណាប់អារម្មណ៍ចង់ទៅប្រកបអាជីពនៅលីគកំពូលអង់គ្លេសក្នុងថ្ងៃណាមួយនាពេលអនាគត ខណៈបច្ចុប្បន្នគេកំពុងកើបលុយនៅក្លិប Shanghai SIPG នៅលីគប្រទេសចិន ដោយអាចរកថ្លៃនឿយហត់បាន៣៨ម៉ឺនអឺរ៉ូក្នុងមួួយសប្ដាហ៍ ស្មើនឹងប្រមាណ២០លានអឺរ៉ូ មួយរដូវកាល។
កីឡាករវ័យ៣០ឆ្នាំធ្លាប់ត្រូវបណ្ដាក្លិបនៅ Premier League ចែចូវច្រើនលើកច្រើនសាអំឡុងលេងនៅ FC Porto ក្នុងប្រទេសព័រទុយហ្គាល់ និង Zenit St. Petersburg របស់រុស្ស៊ី។
Hulk រៀបរាប់ពីចំណាប់របស់ខ្លួនបែបនេះ ៖ “ដូចខ្ញុំបាននិយាយអ៊ីចឹង ខ្ញុំតែងតែតាមដានបាល់អង់គ្លេស ជាទូទៅ ព្រោះវាមានការប្រកួតប្រជែងខ្លាំង។ ប៉ុន្តែ ខ្ញុំមិនបង្ហាញអត្តសញ្ញាណ ថាក្រុមណាជាក្រុមខ្ញុំចូលចិត្តបំផុត។ ប្រហែលជាមួយដែលមិនសូវផ្លាស់ប្ដូរសមាសភាពច្រើនក្នុងក្រុម អាចជា Arsenal ជាដើម។ យ៉ាងណាក៏ដោយ ពួកគេមិនសូវឈ្នះពានអីសោះប៉ុន្មានឆ្នាំចុងក្រោយ។ ពួកគេខានលើកពាន Premier League យូរហើយ ប៉ុន្តែការលេងរបស់ពួកគេពិតជាគួរឲ្យចាប់អារម្មណ៍ខ្លាំងមែនទែន ហើយខ្ញុំក៏ចូលចិត្ត Chelsea។ ខ្ញុំចូលចិត្តការលេងរបស់ក្រុមទាំង២ខ្លាំងណាស់”។
Hulk បានចាកចេញពី Zenit St. Petersburg ទៅកាន់ Shanghai SIPG កាលថ្ងៃទី៣០ ខែមិថុនា ឆ្នាំ២០១៦ ក្នុងតម្លៃឯតទគ្គកម្មអាស៊ីនាពេលនោះ គឺ ៥៥លានអឺរ៉ូ៕
