ខ្សែប្រយុទ្ធជម្រើសជាតិអ៊ុយរុយហ្គាយរូបនេះនឹងលេងបាន១០០ប្រកួតឲ្យBarcelona ពេលជួបក្រុម Girona ក្នុង La liga ហើយលើសពីនេះ រូបគេបាននិយាយពីអាជីពបាល់ទាត់របស់ខ្លួនពេលមកលេងនៅអេស្ប៉ាញ។
ពេលអ្នករាយការណ៍ព័ត៌មានសួរថាតើខ្សែការពារនិងអ្នកចាំទីរូបណាដែលលោកគិតថាធ្វើឲ្យអាជីពបាល់ទាត់នៅអេស្ប៉ាញ ជួបការពិបាកហើយ Luis Suarez មិនស្ទាក់ស្ទើរក្នុងឆ្លើយនោះទេ។
“ Sergio Ramos គឺជាខ្សែការពារដែលតឹងតែងបំផុតដែលខ្ញុំធ្លាប់លេងតទល់។ គាត់ពិតជាមានការប្រកួតប្រជែង ហើយមានបទពិសោធន៍ក្នុងការប្រកួតជាច្រើន”។ Luis Suarez ធ្លាប់ទាត់បញ្ចូលទីក្រុម Real Madrid ទាំងក្នុងទឹកដី Camp Nou និង Bernabeu ដោយការប្រកួតទាំងនេះតែងតែមាន Serigo Ramos លេងតទល់រហូត។
ពេលដែលសួរថា នរណាជាអ្នកចាំទីល្អបំផុតដែលលោកធ្លាប់ជួបប្រទះ ហើយគាត់និយាយ៖” Carlos Kameni, ខ្ញុំមិនដែលស៊ុតទម្លុះដៃដ៏ស្អិតរបស់គាត់បានម្ដងណាឡើយ។ Kameni គឺជាអតីតអ្នកចាំទីរបស់ Malaga កាលពីរដូវកាលមុនហើយរូបគេទើបតែប្ដូរចេញទៅលេងនៅទួរគីកាលពីប៉ុន្មានខែមុននេះ។
អ្នកចាំទីរូបនេះបានធ្វើឲ្យខ្សែប្រយុទ្ធជាច្រើននាក់ខកចិត្តមិនស្ទើរទេហើយក្នុងនោះក៏មាន Suarez ដែរ។ អាជីពនៅ Malaga រូបគេរបូតគ្រាប់បាល់ត្រឹមតែ៨៧គ្រាប់ប៉ុណ្ណោះក្នុងការប្រកួត ឲ្យ Malaga ១១៣ប្រកួត៕
