ក្រុមអត្តពលិករបស់កម្ពុជា អស់វិញ្ញាសាដែលត្រូវប្រកួតដណ្តើមមេដាយទៀតហើយក្នុងព្រឹត្តិការណ៍កីឡាស៊ីហ្គេមឆ្នាំ២០១៧ នៅប្រទេសម៉ាឡេស៊ី គិតត្រឹមថ្ងៃពុធ ទី៣០ខែសីហា ឆ្នាំ២០១៧ នេះក្រោយរកបានមេដាយ សរុបចំនួន១៧គ្រឿង ឈរពីលើប្រទេសឡាវ ប្រ៊ុយណេ និងទីម័រខាងកើត។
ក្នុងចំណោមប្រភេទចំនួន២៤ប្រភេទដែលមានអត្តពលិកសរុប១៦៩នាក់ កម្ពុជា រកបានមេដាយមាសចំនួន៣ គ្រឿង មេដាយប្រាក់២គ្រឿង និងមេដាយសំរឹទ្ធ១២គ្រឿង មកពីប្រភេទកីឡាចំនួន៧។បើធៀបនឹងស៊ីហ្គេមកាលពីឆ្នាំ២០១៥ នៅប្រទេសសិង្ហបុរី កម្ពុជា បានបញ្ជូនអត្តពលិកទៅប្រកួតលើ២៣ប្រភេទកីឡាដោយដណ្តើមបានមេដាយមាស ១គ្រឿង ប្រាក់៥គ្រឿង និងសំរឹទ្ធ៩គ្រឿង។
ប្រភេទកីឡាដែលដណ្តើមបានមេដាយលើកនេះមាន ប៉េតង់ទទួលបានមេដាយមាស១ ប្រាក់១ និងសំរឹទ្ធ៣ ប្រដាល់គុនខ្មែរ បានមេដាយមាស១ ប្រាក់១ និងសំរឹទ្ធ២ រីឯតេក្វាន់ដូ បានមេដាយមាស១ និងសំរឹទ្ធ២។ ប្រភេទកីឡាផ្សេងទៀតដែលទទួលបានសុទ្ធតែមេដាយសំរឹទ្ធ រួមមាន ឈិនឡូន ២ ជិះសេះ១ វាយកូនបាល់១ និងប្រដាល់សកល១។
ចំណែកប្រាក់រង្វាន់លើកទឹកចិត្តដល់ម្ចាស់មេដាយ រាជរដ្ឋាភិបាល ក៏ដូចជាក្រុមហ៊ុនឯកជនបានត្រៀមប្រាក់រង្វាន់ទឹកប្រាក់មានដូចជា៖
*មេដាយមាសលើវិញ្ញាសារឯកត្តជន
១) មេដាយមាស ទទួលបាន ១០ ០០០ ដុល្លារ ពីរាជរដ្ឋាភិបាល, ៥ ០០០ ដុល្លារ ពីសម្ដេចនាយករដ្ឋមន្រ្តី ហ៊ុន សែន និង ៩ ០០០ ដុល្លារ ពីក្រុមហ៊ុនចំនួនពីរទៀត។ សរុប ២៤ ០០០ ដុល្លារ។
២) មេដាយប្រាក់ ទទួលបាន ១៣ ៥០០ ដុល្លារ
៣) មេដាយសំរឹទ្ធ ទទួលបាន ៧ ០០០ ដុល្លារ
*មេដាយមាសវិញ្ញាសាកីឡាជាក្រុម
១) មេដាយមាស ទទួលបាន ៨ ០០០ ដុល្លារ
២) មេដាយប្រាក់ ទទួលបាន ៥ ០០០ ដុល្លារ
៣)មេដាយសំរឹទ្ធ ទទួលបាន ៣ ០០០ ដុល្លារ
សូមរំលឹកថាព្រឹត្តិការណ៍កីឡាស៊ីហ្គេមឆ្នាំ២០១៧ នេះនឹងចាប់ផ្ដើមពីថ្ងៃទី១៩ ខែសីហា ហើយបិទទៅវិញនៅថ្ងៃទី៣០ខែសីហា ឆ្នាំ២០១៧ ខណៈវិញ្ញាសារកីឡាមួយចំនួនប្រកួតមុនថ្ងៃបើកឆាកមកដល់។ ស៊ីហ្គេមឆ្នាំនេះក្រោមពាក្យស្លោកថា « Rissing Together»។ គណៈកម្មការរៀបចំការប្រកួតបានដាក់កីឡាចំនួន៣៨ប្រភេទ មាន៤០៥ វិញ្ញាសា នឹងដាក់ឱ្យអត្តពលិកប្រមាណជា៤៨៨៨នាក់ មកពីប្រទេសជាសមាជិកទាំង១១ចូលរួមប្រកួតប្រជែង៕
