ពានរង្វាន់បាល់ទាត់ជម្រើសជើងឯកជាតិ (Metfone Cambodian League 2017) ត្រូវសម្រាកជាងកន្លះខែ ដើម្បីផ្ដល់ឱកាសឱ្យកីឡាករជនជាតិខ្មែរដែលល្អៗ បានចូលរួមជាមួយក្រុមជម្រើសជាតិកម្ពុជា ត្រៀមប្រកួតក្នុងលើឆាកអន្តរជាតិសំខាន់ទាំងមិត្តភាពអន្តរជាតិ និងវគ្គជម្រុះជុំទី៣ នៃពានរង្វាន់ជើងឯកទ្វីបអាស៊ី AFC Asian Cup UAE 2019។
យោងតាមកម្មវិធីប្រកួតក្នុងពានរង្វាន់លីគកំពូលកម្ពុជា បានកំណត់ថ្ងៃថាក្រោយបញ្ចប់សប្ដាហ៍ទី១២ ត្រឹមថ្ងៃទី២៨ ខែឧសភា ឆ្នាំ២០១៧ ក្រុមទាំង១២សមាជិកនៃពានរង្វាន់នេះត្រូវសម្រាករហូតដល់ថ្ងៃទី១៧ ខែមិថុនា ឆ្នាំ២០១៧ ទើបចាប់ផ្ដើមវិញក្នុងសប្ដាហ៍ទី១៣។ អំឡុងពេលសម្រាកនេះមានកីឡាករសំខាន់ៗចំនួន២៥នាក់ត្រូវកោះហៅត្រៀមចូលរួមប្រកួតក្នុងជំនួបមិត្តភាពអន្តរជាតិជាមួយក្រុមឥណ្ឌូណេស៊ី នៅវេលាម៉ោង៦:៣០នាទីល្ងាចថ្ងៃព្រហស្បត្តិ៍ ទី៨ ខែមិថុនា ឆ្នាំ២០១៧ លើទីលានពហុកីឡដ្ឋានជាតិ ខណៈក្រុមមួយនេះបន្តធ្វើជាម្ចាស់ផ្ទះក្នុងវគ្គជម្រុះពានរង្វាន់បាល់ទាត់ជើងឯកទ្វីបអាស៊ី ជាមួយក្រុមអាហ្វហ្គានីស្ថាន នៅថ្ងៃទី១៣ ខែមិថុនា ឆ្នាំ២០១៧។
ចំពោះចំណាត់ថ្នាក់បណ្តោះអាសន្នក្រោយប្រកួតបាន១២សប្ដាហ៍របស់លីគកំពូលកម្ពុជា មានគឺក្រុមព្រះខ័នរាជស្វាយរៀង បន្តឈរលេខ១មាន២៥ពិន្ទុ តាមពីក្រោយដោយក្រុមក្រសួងការពារជាតិ មាន២៤ពិន្ទុ ហើយក្រុមណាហ្គាវើល ឡើងមកឈរលេខ៣ មាន២២ពិន្ទុ ខណៈក្រុមភ្នំពេញក្រោន ឈរលេខ៤ មាន២១ពិន្ទុ។ ក្រុមបឹងកេត ធ្លាក់ទៅលេខ៥ មាន២០ពិន្ទុ ហើយក្រុមខេមបូឌានថាយហ្គឺរ ឈរលេខ៦មាន១៨ពិន្ទុ ហើយអគ្គស្នងការដ្ឋាននគរបាលជាតិ ឈរលេខ៧ មាន១៦ពិន្ទុ។ ក្រុមលេខ៨ គឺអគ្គីសនីកម្ពុជា មាន១៣ពិន្ទុ ដែរ នៅពីលើក្រុមលេខ៩អាស៊ីអឺរ៉ុប មាន១៣ពិន្ទុ ហើយក្រុម វេស្ទើនភ្នំពេញ ឈរលេខ១០ មាន១២ ពិន្ទុ ក្រុមស៊ីម៉ាក់ ឈរលេខ១១ មាន១១ពិន្ទុ ស្របពេលក្រុមគីរីវង់សុខសែនជ័យ ឈរលេខ១២មាន២ពិន្ទុ។
ចំណែកប្រកួតបន្ទាប់ក្នុងសប្ដាហ៍ទី១៣ នឹងធ្វើឡើងនៅពាក់កណ្ដាលខែមិថុនា គឺនៅថ្ងៃទី១៧ ខែមិថុនា ឆ្នាំ២០១៧ ដោយក្រុមអាស៊ីអឺរ៉ុប ប៉ះក្រុមព្រះខ័នរាជស្វាយរៀង នៅវេលាម៉ោង៦លើទីលានស្តាតចាស់ ហើយក្រុមណាហ្គាវើល ជួបក្រុមគីរីវង់សុខសែនជ័យ លើទីលានពហុកីឡដ្ឋានជាតិ វេលាម៉ោង៦ល្ងាច ខណៈក្រុមវេស្ទើនភ្នំពេញ ទទួលស្វាគមន៍ក្រុមខេមបូឌានថាយហ្គឺរ នៅម៉ោង៣:៣០នាទីរសៀល លើទីលានកីឡដ្ឋានវេស្ទើន។ ចំណែក៣គូផ្សេងទៀតធ្វើឡើងនៅថ្ងៃទី១៨ខែមិថុនា គឺក្រុមអគ្គីសនីកម្ពុជា ទទួលក្រុមក្រសួងការពារជាតិ លើទីលានកីឡដ្ឋានខេត្តស្វាយរៀង វេលាម៉ោង៦ល្ងាច ហើយក្រុមបឹងកេត ជួបក្រុមអគ្គស្នងការដ្ឋាននគរបាលជាតិ វេលាម៉ោង៦ល្ងាចលើទីលានពហុកីឡដ្ឋានជាតិ និងក្រុមភ្នំពេញក្រោន ទទួលក្រុមស៊ីម៉ាក់ នៅវេលាម៉ោង៦ល្ងាចលើទីលានកីឡដ្ឋាន RSN Stadium។
សូមរំលឹកថាសហព័ន្ធកីឡាបាល់ទាត់កម្ពុជា បានសម្រេចបង្កើនក្រុមជាសមាជិកលីគកំពូលរបស់ខ្លួនឱ្យកើនឡើងរហូតដល់១២ក្លិប ដោយត្រូវប្រកួតគ្នាចំនួន២ជុំ និងបន្តវគ្គPlay-Off ស្វែងរកជើងឯក ដោយចាប់ចាប់ផ្តើមពីថ្ងៃទី១៨ ខែកុម្ភៈ ដល់ថ្ងៃទី២ ខែធ្នូ ឆ្នាំ២០១៧។ ក្រុមជើងឯកលីគកំពូលកម្ពុជា មានឱកាសប្រកួតលើឆាកអន្តរជាតិជាច្រើនដូចជាពានរង្វាន់ Toyota Mekong Club Championship និងពានរង្វាន់ AFC Cup ជាដើម៕
