កាលពីម្សិលមិញ អ្នកចាត់ការ Real Madrid លោក Zinedine Zidane បានសម្រេចចិត្តលាលែងពីតំណែងយ៉ាងគួរឲ្យភ្ញាក់ផ្អើល។ ក្នុងសន្និសីទសារព័ត៌មានភ្លាមៗរបស់ក្រុមរហស្សនាមអធិរាជស បុរសជនជាតិបារាំងបាននិយាយថាខ្លួនមិនបន្តដឹកនាំក្លឹបយក្សអេស្ប៉ាញទៀតទេនារដូវកាលក្រោយ។
ការប្រកាសចាកចេញពីតំណែងអ្នកចាត់ការ Real Madridនេះ ធ្វើឡើង ១ សប្ដាហ៍ ក្រោយក្លឹបទើបបានតែឈ្នះ Champions League រដូវកាលនេះប៉ុណ្ណោះ។
បុរសវ័យ៤៥ឆ្នាំបាននិយាយយ៉ាងខ្លីថា៖ “ក្រោយរយៈពេល ៣ ឆ្នាំ ការផ្លាស់ប្ដូរ គឺចាំបាច់”។ យ៉ាងណាក្តី Zidane បានបង្ហើរថា ខ្លួននឹងអាចមកដឹកនាំក្លឹប Real Madrid ម្ដងទៀតនាពេលអនាគត។
ក្នុងអំឡុងពេល ៣ ឆ្នាំក្នុងការដឹកនាំ Real Madrid លោក Zinedine Zidane ឈ្នះពានជាមួយក្លឹបដល់ទៅ ៨ ពាន ក្នុងនោះរួមមានពាន Champions League ៣ឆ្នាំជាប់គ្នា ពានលីគកំពូលអេស្ប៉ាញ (រដូវកាល ២០១៦/១៧) ពាន UEFA Super Cup ២លើក FIFA Club World Cup ២ដង និង Supercopa de Espana មួយលើកផងដែរ៕
